شاهد.. مذيعة «ميجا إف إم» توجه رسالة قاسية لفناني الجيل الجديد

عبرت همسة إمام، مذيعة محطة "ميجا إف إم" مقدمة برنامج "من إمبارح للنهاردة"، عن غضبها الشديد من الجيل الجديد للفنانين؛ بسبب تعاملهم بغرور، وذلك بعد أن أغلقت أحد فنانات هذه الجيل الهاتف في وجهها لرغبتها في أن تجري معها مداخلة هاتفية مدتها دقيقتين في البرنامج.

ونشرت همسة، عبر صفحتها الشخصية بموقع التواصل الاجتماعي "فيسبوك" منشورًا كتبت فيه: "جيل جديد من النجوم للأسف فيه كم غرور وعدم احترام لمهنة المذيع اللي بيحاول يعمل شغله بكل ذوق و بأدب.. شغلي وشغل حضرتك مرتبطين ببعض وممكن تعتذر بكل ذوق، بدل التجاهل و عدم الرد لأني بكل بساطة بعمل شغلي زي ما حضرتك بتعمل شغلك، وأنا عارفة أنك مشغول بس مجرد أنك ترد علي برسالة: اعتذر و شكراً، ده هيأخرك عن حاجة؟".

وأشارت همسة إلى أن موقف واجهتها مؤخرًا مع فنانة شابة وحفيدة فنان راحل، دون أن تذكر اسمها، هو السبب في حديثها، وقالت: " لما اتصل بنجمة شابة لمدة ٣ أيام عشان في حلقة  بأحيي ذكرى وفاة جدها و أحاول أعمل مداخلة تليفونية معاها لمدة دقيقتين و تقفل السكة في وشي بعد ما قالت لي أكلمها عشان نتفق على معاد المداخلة و ما تردش ولا بإعتذار و لا بمكالمة يبقى فيه حاجة غلط في جيل مش فاهم يعني ايه مذيع بيحاول يعمل شغله زي ما حضرتك بتعافري عشان تاخدي دور في اي عمل فني او ما بتعافريش مش عارفة!".

وتابعت: "المنفعة متبادلة و عمري ما هقلل من نفسي مع نجم مش بيحترم مهنتي و لا بيحترم مجهود بيتعمل بكل احترام.. فرق كبير جداً بين نجمة شابة ما بقالهاش ٥ سنين بتشتغل و نجوم كبار بقالهم أكتر من ٢٠ سنة و بيردوا بكل ذوق و امتنان و بيقبلوا يطلعوا على الهواء أو بيعتذروا بكل أدب.. تحية كبيرة واحترام لكل نجم بيحترم مهنتي كمذيعة و لكل نجم ركبه الغرور و العنجهية... عايزة اقول له : النجم سيرة و قبل أي شيء كلنا بنجتهد في شغلنا... و الإحترام لازم يكون متبادل. و شكر خاص جداً لكل الفنانين اللي شرفت بيهم طول ما أنا بشتغل في مهنتي اللي بحبها و بحترمها و مش هسمح لحد يهينها".

وأنهت المذيعة همسة إمام شكواها كاتبة: "افتكروا دايماً البدايات عشان فعلاً الأخلاق بتبان في النجومية و الشهرة".