عمر طاهر يوجه رساله مؤثرة لوالده بعد إصابته بفيروس كورونا

وجه الكاتب والشاعر عمر طاهر، رسالة مؤثرة لوالده بعد إصابته بفيروس كورونا المستجد، وذلك من خلال حسابه الشخصي على موقع التواصل الاجتماعي "فيسبوك"

ونشر عمر طاهر، صورة نادرة تجمعه بوالده وعلق عليها قائلا: "والدي العزيز.. صباح الفل.. مش عارف ليه حاسس إني مدين ليك باعتذار عن تسلل فيروس كورونا لجسدك النحيل.. نفسي شعوري الغامض بمسئولية ما لما بنتي الـ6 سنين تسخن وتكح طول الليل.. أو نفس شعوري تقريبا سنة 88 لما كنت شايل معاك أنبوبة البوتاجاز وطالعين بيها سلم العمارة في سوهاج وحبيت أهرش فوقعت الأنبوبة كسرت لك مشط رجلك".

وأضاف: "أو نفس شعوري بعدها بسنة لما كنا في المنتزه ووقفت علشان أساعدك تركن تحت شجرة وفضلت أقولك بحماس تعالى تعالى وأنا عيني على شلة بنات بتلعب راكيت فكان طبيعي إنك تلبس في الشجرة بكل قوتك.. أو نفس شعوري لما سيحت دم الابن الوحيد لصديقك العزيز وسببت لهم ذعر في العيلة وأنت أخدتني اعتذر له وبعد ما اعتذرت والنفوس هديت قرصته في ساعتها في دراعه قرصة أفسدت كل شىء لفترة طويلة".

وتابع: "حاسس بتقصير وخصوصا إني مش مسموح لي غير بإني أسيب لك طلباتك والأدوية والفاكهة على باب البلكونة الألوميتال ونشاور لبعض.. صحيح إني فخور بيك وبقوتك وبإنك تجاوزت الفترة الصعبة وفاضل يومين على المسحة التانية.. فخور إنه في عز ما الشكوى في العالم كله من كورونا تتمثل في ضيق التنفس والنهجان والكحة أنت بتشتكي من الحموضة".

وإستكمل: "بس أول مرة مابقاش تحت رجليك.. خضت معاك كل التجارب.. المعدة والمرارة والسكر والمية البيضا وأنا بأحاول أرد جزء من جمايلك على طفل عذبك معاه بس المرة دي كل اللي مسموح لي أحوم حواليك.. فتلاقيني حاسس إني مقصّر.. نفسي أقعد جنبك و أرد لك الطبطبة اللي لسه معلمة على كتفي يوم ما كنا ماشيين في جنازة جدو عمر وأنا عندي سبع سنين.. عمري ما أنساها.. أو أقعد معاك أدمس لك فول زي ما سبت اللي وراك واللي قدامك وقعدت معايا أسبوع في المعادي وأنا كبير بأعاني من نوبة كآبة حادة داويتها أنت بريحة التدميس والشاي والبخور والفضفضة طول الليل وجلسات استعادة الثقة بالنفس وعلبة السجاير الجديدة والولاعة اللي كنت بتحطها لي على رف الدولاب من ورايا ومشوار الفجر.. تاكسي.. السيدة نفيسة لو سمحت".

واختتم  رسالته: "كان نفسي أتفرج على ماتش النهاردة مع أشيك زملكاوي عدي عليا.. عموما هانت والحمد لله كلها يومين وتلاقيني لازق فيك.. أنا بس حبيت أصبح عليك أنا وأصحابي على فيس بوك.. هتلاقيهم في التعليقات بيلاغوك من ورا الإزاز زيي.. يومك جميل يا كشك كهرباء حياتي كلها.. واحشني".