ليست المرة الأولى.. قصة خلاف شيرين مع الراحل حسن أبو السعود
الحب والوفاء للموسيقار حسن أبو السعود دفع جمهوره للدفاع عنه بعد الإساءة التي تعرض لها نتيجة تصريحات شيرين عبد الوهاب، التي قالت في صدد هجومها على حسام حبيب، خلال برنامج "كلمة أخيرة" الذي تقدمه لميس الحديدي، وهي تقول " أنا كنت زي البدر ولما عاشرته بقيت شبه حسن أبو السعود"
ومن جانبها أبدت أسرة الفنان حسن أبو السعود استيائها الشديد عقب تصريحات شيرين عبد الوهاب وقالت "رشا" ابنة الموسيقار الراحل حسن أبو السعود، إن شيرين عبد الوهاب تسيء دوما لوالدها رغم دعمه لها في بداية مشوارها الفني.
وقالت أسرة حسن أبو السعود في بيان وقعته ابنته رشا "في ميزان الإنسانية إيه قيمة الموهبة إذا اقترنت بالإساءة؟ التنمر والسخرية من الناس عيب، ومش حقول شخص واكلين معاه عيش وملح وله فضل علينا، لأن الإساءة لشخص ميت مستوى أكثر انحداراً"
وأضاف لبيان: "وقت الحساب المسيء حيقول لربنا إيه، حيقوله لأ متحاسبنيش إني بتريق على ميت وبجرحه وبجرح محبيه وأسرته، أصل أنا موهوب أو مشهور أو غني؟ لأ متحاسبنيش أصل أنا أحسن فنان في الكون؟"
واختتم البيان: "كلمة أخيرة، حسن أبو السعود الله يرحمه شكلاً كان قمر وشخصيةً كان دمه سكر وطيب وكريم ومتواضع ومثقف وبيتكلم 3 لغات أجنبية بطلاقة ولبق وذوق، فمش ممكن حتكوني شبهه في يوم من الأيام".
خلافات قديمة
وقالت رشا في تصريحات صحفية أنا تذكر واقعة أغنية "متجرحنيش" للفنانة شيرين عبد الوهاب حين أبدت ندمها الشديد عليها، ما دفع الشاعر بهاء الدين محمد للرد عليها ومهاجمتها، لتخرج وقتها وتعلن أن أزمة الأغنية كانت في لحن والدي وليس الكلمات، وهو ما يعتبر إساءة متعمدة منها.
ووجهت رشا سؤالا للفنانة شيرين عبد الوهاب قائلة: " لماذا تسيئين لوالدي رغم أنه ميت؟، أنتِ بكلامك أحرجتي أسرة كاملة من دون أي ذنب، وأنتِ لديكي بنات ولا ترضين أبدًا إساءة أحد لكِ".
وتابعت رشا في تسجيل صوتي " الأسرة كلها مستاءة، وأي حد بيحبه وبيحب فنه أكيد مستاء، وفي آلاف التعليقات على السوشيال بتدافع عنه وبتترحم، البديهي اللي إحنا تربينا عليه، نذكر محاسن موتانا، مش البديهي إن إحنا نتريق على حد توفي".
وأضافت ابنة حسن أبو السعود : "بني آدم كان مريض وتوفى عنده 57 سنة، عشان كان مريض، وآه كان تخين ماشي أوكيه، بس حضرتك ممكن تشبهي ده بأي حد كان في عيلتك ممكن يكون تخين، مفيش داعي أبدا إنك تجيبي سيرة عليتي أنا، متجبيش سيرة والدي أنا، الخلاف اللي بينكم زمان كان مهني، والمفروض إنه خلص، والراجل مات، خلاص حضرتك، شيليه من دماغك".
وشرحت: "هي كل فترة لازم تخبط فيه بشكل مباشر وغير مباشر، أنا مش فاهمه حاطاه في دماغها ليه كل ده؟، متوفي من زمان جدا، والديلوجن بتاع إن إحنا نجرح الناس، وعادي إتس أوكيه، إن الناس نقول عليهم أي حاجة، أصلنا فنانين، لأ الكلام ده يعني للأسف الناس اللي بيشجعوها وبيعذروها طول الوقت، هما اللي مخلينها متمادية كده، وأحب أعرفكم إن كلمة عفوية انتحرت خلاص، هي مش هتقدر تبقى في السياق اللي بيحصل ده".
وأوضحت رشا ابنة حسن أبو السعود: "شوهتولي معنى كلمة عفوية من كتر ما كل ما نقول حاجة وحشة، لأ، معلش أصلها عفوية، لأ، مش مسموح ومش مقبول، ومش هسمح أن حد يجيب سيرة والدي تاني، عيب، عيب جدا، هو أنا محتاجة أقول عيب؟ ده بديهي يا جماعة، بديهي أنه عيب".
وطلبت من شرين مطلبا واحدا قائلة: "لو سمحتِ متجبيش سيرته تاني، ولا هي ولا غيرها، اللي عنده كلمة كويسة يقولها، اللي معندوش كلمة كويسة ومش قادر يترحم على واحد توفى، يبقى يلتزم فن الصمت، نسكت خالص".
اعتذار شرين عبد الوهاب
واعتذرت الفنانة شيرين عبد الوهاب في تصريحات صحفية لأسرة الموسيقار الراحل حسن أبو السعود، وأكدت أنها تكن كامل الاحترام للموسيقار الراحل ولأسرته، مضيفة أن له مكانة فنية كبيرة، فضلا عن أنه "ساهم في مشوارها الفني".
