شيرين عبدالوهاب تعتذر لأسرة الموسيقار حسن أبو السعود

اعتذرت الفنانة  شيرين عبد الوهاب في تصريحات صحفية لأسرة الموسيقار الراحل حسن أبو السعود.

وأكدت شيرين عبد الوهاب أنها تكن كامل الاحترام للموسيقار الراحل ولأسرته، مضيفة أن له مكانة فنية كبيرة، فضلا عن أنه "ساهم في مشواري الفني".
كانت شيرين عبدالوهاب قد أهانت الموسيقار الراحل، وقالت خلال مداخلة تلفزيونية، إنها كانت زي القمر قبل الزواج، لكن بعد زواجها من الفنان حسام حبيب أصبحت تشبه الموسيقار حسن أبو السعود، إشارة إلى زيادة وزنها، ما أغضب أسرته بشدة واعتبروه إهانة وسخرية من والدهم الراحل الذي كان له فضل كبير في نجوميتها.

كانت شيرين عبدالوهاب قد كشفت حقائق صادمة عن حياتها مع طليقها حسام حبيب، قائلة : “مارس معي كل أشكال الابتزاز مش عازوني  أعمل أي حاجة في حياتي غير أبقى قاعدة قدامه بس”.

تابعت خلال مداخلة هاتفية ببرنامج "كلمة أخيرة “ الذي تقدمه الإعلامية لميس الحديدي على شاشة  ON:” لو رحت عملت حفلة أو فرح ناجح  ينكد عليا  ويقلي كنتي ماكسة الراجل كده ليه والواد  بيعمل معاكي كده ليه ؟ أقله ده قد ابني ولو عملت إعلان ناجح زي إعلان بنك مصر وأبقى تريند والناس مبسوطة بيا لازم هو ينكد عليا ويبوظ اليوم".

وأضافت: "تم طلاقنا بعد حلق رأسي وكان طلاق بائن وبعد أن هدأت من الكارثة ، شعرت أني لا أستطيع  الاستغناء عنه ولازم أديله فرصة تانية وأن ماينفعش نبعد عن بعض وكنت مؤمنة أن العلاقة مقدسة  وكنت بحبه وفاكراه ابني مش جوزي  وعملتله إستوديو  لشغلنا وقمت بشراء  كل الأغاني التي أعجبته بشيكات بإسمي عشان ماترحش منه".

وكشفت عن تعرضها للتنمر من حسام حبيب قائلة : "بعد ماعمل كل ده الاقيه بيتهمني  ويتنمر عليا ويقلي تخنتي وبقيتي شبه أمك وأنا عاوز واحدة أتباهى بيها قدام الناس تبقى حلوة ورفيعة وكلام من ده بخلاف الخناقات التي تعرضت  فيها للضرب والسحل على الأرض وشتيمة عمر ما في إنسانه تقلبها على نفسها".
وواصلت:" لما تم طلاقي رجعتله وأدي فرصة أخرى بشروط وكان يتردد على بيتي عشان فيه أستوديو تحت البيت وقتها وبينا شغل وحاولت أهيأ البنات أنه لازال موجود  لحد ما تلاشت الوعود مجدداً ورجعت المشاكل وقلة الأدب ترجع بلا سبب".

واستطردت :" أنا عندي مشكلة أني لما بتعصب بوصل لليفل صعب ممكن أذي نفسي ودكتوري نصحه بتركي لفترة  حتى ولو ربع ساعة أو أني أدخل اوضتي  شوية لحد ما أهدى  لكن هو أصر في كل خناقة يفضل قدامي يحرق في دمي وأعصابي لحد ما أمسك الماكينة واحلق شعري".

ورداً  على سؤال الإعلامية لميس الحديدي "كان عايز يوصل لإيه في الآخر؟"،  قالت : "أنا كنت فوق ولازلت وهو كان تحت  ولما ماعرفش يطلعلي فوق حاول ينزلني تحت، وده تحليلي لكل اللي حصل ".

وأتمت : "اسفة على اللي عملته في نفسي وبناتي وجمهوري اللي كان مقتنع أني مش على ما يرام  وكنت بطلع أقول كلام غير الحقيقة ".

وكشفت أنها  اتجهت للغناء  يوم أن كانت حليقة الرأس  حتى لا يصاب بناتها بعقدة قائلة :" طلعت غنيت عشان  بناتي مايتعقدوش لأني كنت قرعة".