ريم مصطفى: «مش بكره الرجالة بس الستات كائنات مختلفة»
كشفت الفنانة ريم مصطفى أن كثير من الأدوار في الأعمال التي تشاهدها تصيبها بحالة من الاستفزاز الفني قائلة: :" بتحصل كتير أوي بشوف أدوار تستفزني وأقول كان نفسي أعمل الدور ده".
ورداً على سؤال الإعلامية لميس الحديدي: هل جمالك حصرك في أدوار معينة ؟ قالت -خلال لقاء عبر برنامج " كلمة أخيرة " على شاشة ON"-:"بالفعل ده بيحصل وكل شيء له ميزة وعيب أنا شكلي خادع بطبيعة الامر عن الكراكتر الأصلي بتاعي يعني محدش يتخيل أني أعمل دور واحدة " بيئة " أو شعبية " رغم أن أول " أوديشن " قمت به كان مشهد لنبيلة عبيد في شادر السمك ولما دخلت هبة رجل الغراب مكنش حد يتخيل أني جاية من شادر السمك "، موضحة أنها تتمنى تقديم شخصيات وأدوار أخرى بخلاف الأدوار التي حصرتها فيها ملامحها الشقراء قائلة: "الكراكتر بتاعي يقدر يقدم حاجات كتيرة مختلفة ".
وعن حياتها الشخصية ومدى إتباعها لنظام غذائي قالت: " أنا بحب الاكل جداً وبكره الدايت بس في بعض الأوقات لما الدنيا بتبوظ ببدأ أركز أني أخلي بالي ورغم أني طويلة بس زيادة الوزن بتظهر عليا وبلعب رياضة من وقت لأخر بدون انتظام خاصة لو فيه تصوير".
وواصلت:" أنا بحب أدخل المطبخ وبعمل أكل حلو جداً ولو دخلت المطبخ بليل ولقيت محشي في الثلاجة هاكله ومش هيفرق معايا خالص وبحب أطبخ جداً وبعمل كل الاكل الي ممكن تتخيلوه أنا طباخة شاطرة حتى السي فود بعمله أنا مقتنعة أن الي بيحب الاكل لازم يعرف يطبخ ”.
ومازحتها الحديدي قائلة: ياهناه ياسعده متسائلة: إيه تاني أسوأ حاجة بعد الدايت الرجالة ؟ لتجيب طاحكة: "مش بكرهم بس دمهم تقيل أنا حاسة ان الستات كائنات مختلفة اضطروا يتحطوا في كوكب فيتعاملوا مع بعض عشان كده بيحصل تصادم".
ورداً على سؤال الحديدي : ماهي أكثر الأشياء التي تكرهها في الرجال؟ قالت: أنا شايفة ان أكتر أمر مهم بين الرجل والست أن يحترموا اختلافاتهم لكن طول الوقت الرجالة بتحاول تخلي الي قدامها شبهها أو العكس صحيح لكن لو احترمنا أن ربنا خلقنا كائنات مختلفة فالأمر سيختلف وهتبقى الدنيا تمام".
