حمو بيكا يرد على قرار الموسيقيين بمنعه من الغناء

نشر حمو بيكا فيديو عبر تقنية البث المباشر من خلال صفحته على موقع التواصل الاجتماعي فيسبوك، ردا على قرار نقابة الموسيقيين بمنعه من الغناء.

قال حمو بيكا: «بشكر نقابة المهن الموسيقية، ليكم كل الاحترام والتقدير، أنا فرحان وسعيد لأنى بسمع نفس القرار بقالى 5 سنين.. اتكلمت كتير وتعبت واتعملى قضايا ومحاضر.. أنا معايا ناس فاتحة بيوت كتير.. ناس كتير لا تصلح للغناء وبيغنوا ومعاهم كارنيه النقابة..  مش هقول أسماء عشان دول صحابى وواكلين مع بعض عيش وملح.. أنا صوتى عاجبنى وعاجب الناس وبيسمعونى خدوا رأيهم في قرار الوقف.. لو مش عايزينا نبطل غنا».

وأضاف: «فى حفلات الساحل الشمالى التصريح بتاعى بـ 15 ألف جنيه كنت بدفع ومابتكلمش..  الناس بتستقبلنا بره مصر أحسن استقبال.. عايزنا نشتغل بره مصر ونسيب بلدنا.. فى اختبارات نقابة الموسيقيين قدمت الفيش بتاعى ونضيف الحمد لله وغنيت أغانيا ومع ذلك سقطت».

يذكر أن نقابة المهن الموسيقية أعلنت اليوم، الأربعاء، كشفا بأسماء الممنوعين من الغناء، وهم حمو بيكا وحسن شاكوش وكزبرة وحنجرة ومصطفي زكريا محمد علي الشهير بمسلم وأبو ليلة وأحمد قاسم الشهير بـ فيلو وأحمد موزة وحمو طيخة وريشا كوستا وسمارة، وشواحة وولاد سليم والعصابة والزعيم وعلاء فيفتى وفرقة الكعب العالى ومجدى شطة ووزة وشكل وعمرو حاحا، مع منع غير أعضاء النقابة وغير المصرح لهم بالعمل لحين تصحيح أوضاعهم.