«سفيرة التضامن».. ردينة متطوعة صندوق الإدمان تخوض حربًا للتوعية بمخاطر التعاطي
«الحرب.. الحرب ليست فقط جيوش وقوات وسلاح.. الحرب ممكن تكون داخل الإنسان.. أسلحتك فيها فهمك ووعيك.. قوتك أنك مش هتروح للغلط.. أنك هتقاوم وتواجه بعزيمتك وبإرادتك».. هكذا قالت ردينة متطوعة في صندوق مكافحة وعلاج الإدمان والتعاطي وبطلة «سفير التضامن».
وتضيف ردينة: "أنا عندي 18 سنة.. رحلتي مع التطوع في الصندوق بدأت من حوالي سنتين .. من زمان وأنا شاغلة نفسي بموضوع التدخين والإدمان.. ودايما بسال نفسي ليه في شباب بيعملوا كده في نفسهم .. طيب ازاى أساعدهم وأبعدهم عن الطريق ده.. كنت بسمع دايما جزء من الشباب بيقول أصل الظروف هي السبب.. لكن مكنتش مقتنعة... ايه اللى يخلى إنسان يعمل كده في نفسه بحجة الظروف؟".
وتابعت:" هنا جات لي الفرصة إني أكون متطوعة في صندوق مكافحة وعلاج الإدمان والتعاطي.. اتعرفت على الصندوق من خلال حملة توعية كانت في مدرستي عن كيفية الوقاية من التدخين.. بدأت رحلتي واتدربت على دليل اختار حياتك علشان أكتسب مهارات التواصل مع الناس.. نزلت أماكن كتير زي المدارس والجامعات وأحياء مختلفة زي حي الأسمرات.. كمان قدمت عرض في الجامعة البريطانية عن كل حاجة اتعلمتها من التطوع".
ولفتت أن أساليب التوعية تختلف بين الشباب والأطفال، مشيرة إلى أنها في الأسمرات وجدت أطفالا كثيرين يرون أن التدخين أو الإدمان أمر عادي، ومنهم من يرى أنه عندما يفعل ذلك يكون رجلا، معقبة “كلام الأطفال بالنسبة لها كان مخيفا”.
وتواصل حديثها قائلة :" بدأت معاهم بالتوعية بمشاكل التدخين و الإدمان علشان أساعدهم حياتهم تبقى أحسن.. عملنا ليهم ورش فيها حكايات وقصص زي قصة انت البطل عن بطولة محمد صلاح.. عملنا ليهم ورش فيها أنشطة زى الرسم والتلوين .. لكن نقطة التحول الأهم في حياتي حضوري منتدى الشباب الدولي في مجال الوقاية من المخدرات.. بعد نجاحي في كل الاختبارات المطلوبة.. كانت مصر لأول مرة تلقي الكلمة الافتتاحية بعد 6 سنين.. وتم اختيار 7 فقط لإلقاء الكلمة الافتتاحية وأنا كنت واحدة منهم".
وأوضحت ردينة أن المنتدى كان خطوة عظيمة تعلمت منه أمورًا كتير.. منها إعداد خطة استراتيجية للمجتمع الذي تعيش فيه للوقاية من الإدمان، متابعة :" انا عايزة أقول للشباب اللى شايفين إن المشاكل هي السبب في الإدمان.. الطبيعي إنك تعدي بمشاكل.. والطبيعي انك هتخرج منها بدروس تتعلمها.. لكن المشكلة اللي بجد لما تروح لسكة ممكن تخسر بيها حياتك.. فأرجوك اختار حياتك.. "إنت أقوى من المخدرات ".
