ياسمين رئيس: ياسر جلال نجم متواضع وكان داعم ليا في "جودر"
عبرت الفنانة ياسمين رئيس عن سعادتها بالتعاون مع الفنان ياسر جلال في مسلسل "جودر: ألف ليلة وليلة".
وقالت ياسمين رئيس خلال لقائها في برنامج "صاحبة السعادة" مع إسعاد يونس: "ياسر جلال كان بيقعد يذاكر معايا، لما مسكت الورق أنا مش عارفة هقول الكلام دا إزاي، كله لغة عربية وميكس مع عامية وصعب جدا طريقة أنا ممثلتش بيها قبل كده جديدة عليا وفي رقص واستعراضات ولبس مختلف، ياسر جلال كان داعم جدا".
وأكملت ياسمين رئيس حديثها عن ياسر جلال: " ياسر جلال كان حافظ دوري ودوره، هو نجم بجد تواضع وأدب وخبرة ومحترم كان بيساعدني طول الوقت، كانت أحلى تجربة إني اشتغلت معاه يمكن لو حد تاني مكنش استحملني طول الوقت يقولي إنتي فاكرة إني مش بغلط أو مش بعيد كان بيهديني".
وحكت ياسمين رئيس عن حماسها الكبير للمشاركة في العمل وأنها كان لديها مشروع آخر وقررت أن تشارك في "جودر:ألف ليلة وليلة" وقالت:"بالنسبة ليا شخصية "شهرزاد" كأن حد قالي أعملي سندريلا، هلبس اللبس وأحكي الحواديت، كان عندي مسلسل مرتبطة بيه في رمضان قلت لهم أنا عمري ما بعمل عملين في رمضان لكن حاربت عشان أقدمه وألاقيله وقت وكويس إني عملت كده المشروع التاني كمل من غيري مكملتش معاهم، ركزت في "جودر" وكان أحلى قرار أخدته".
