لأول مرة.. عمر مصطفى متولي يكشف سبب انسحابه من «مسرح مصر»

كشف الفنان عمر مصطفى متولي، السبب الحقيقي وراء انسحابه من المشاركة في شمس الزناتي، و مسرح مصر، نافيًا أن يكون السبب هو خلاف بينه وبين الفنان أشرف عبدالباقي.

جاء ذلك خلال وجود عمر مصطفى متولي، ضيفًا على البرنامج الإذاعي "الراديو بيضحك" الذي يبث عبر "الراديو 90 90" تقديم فاطمة مصطفى علي، وتطرق خلال حديثه عن مشاريعه الفنية خلال الفترة المقبلة، وعن السبب وراء اعتذاره من المشاركة في فيلم "شمس الزناتي"، إلى جانب كواليس وأسرار كشف عنها لأول مرة.

وعن اعتذاره عن المشاركة في مسرح مصر، قال: «هو فيه أطيب من أشرف عبدالباقي، هل تتخيلي أن حد يبقى شغال معاه 5 سنين ثم يختلف معاه أوي، ده أحنا كنا بنختلف معاه كل بروفة ونقعد نهزر ونضحك بعدها بـ5 دقايق ومش فاكرين احنا كنا بنتكلم في ايه؟، العلاقة بين الفرقة دي بالذات بيني وبين أشرف كانت عاملة زي علاقة أسرة، لأن النجاح بتاع مسرح مصر ده مايجيش جوه مجموعة بتتخانق كتير مستحيل، أنا كنت وقتها بحضر فيلم الجبابرة وبالمناسبة ده نزل دعايته على إنستجرام لسه موجود عندي، بس احنا هنضطر نعيده لأن رجاء الجداوي ولبنى محمود ومها أبو عوف التلاتة توفوا إلى رحمة الله، والفيلم ده كمان في حته لوحده، وقصته أنا وسواق أتوبيس مع 10 ستات فوق السبعين وهيتعاد من الأول".

واستكمل: "والفيلم كنا بنحضره وقت ما كان بيبدأ الموسم السادس بتاع مسرح مصر، ومسرح مصر كان بياخد من وقتنا 16 ساعة في اليوم لمدة 4، 5 أيام في الأسبوع، وكده انت حياتك كلها في مسرح مصر،اخرك تصور جمبه حاجة هادية أو بسيطة ده لو لحقت، واحنا عشان نصور أوشن 14 مع مسرح مصر كنا مابنامش وكان الموضوع مرهق جدًا، وكان عندي مشكلة كمان وكانت عندنا كلنا وده طبيعي، أن احنا كنا بقالنا 5 سنين كل سنة بنعمل 25 مسرحية، والفنانين العظماء اللي قبلنا في المسرح كان بيبقى معاهم رواية وتقعد معاه سنين وهو حافظها فمش واخدة من حياته هذا الضغط، إنما أحنا كنا بنعمل رواية جديدة كل 3 أيام، وتحبط أيام أن الرواية مبتضحكش وبعدها بكام يوم تشتغل على مسرحية جديدة خالص".