يسري نصر الله: إكس مراتي عجبني جدًا وكوميدي
كشف المخرج يسرى نصر الله عن أهم الأفلام التي نالت إعجابه في الفترة الأخيرة قائلاً في تصريحات صحفية: "فيلم إكس مراتي عجبنى جدًا، وكوميدي فعلاً وضحكني، وأكثر ما أعجبنى فيه أنه بيضحك بجد زي أفلام زمان بتاعة فطين عبد الوهاب".
فيلم إكس مراتي
أيضًا تطرق يسري نصر الله إلى فيلم رفعت عيني للسما قائلاً: "ما عجبنيش لمجرد إنه خد جايزة في مهرجان كان قد ما عجبني إن كل اللى فيه تعبوا جدًا واستغرقوا وقت طويل علشان يطلع للنور، وتفاصيله تمس الواقع كله اللى بنعيشه بعوالم مميزة وطريقة مناقشة تلمس قلب اللى بيتفرج".
استرجع المخرج يسري نصر الله ذكرياته أثناء الدراسة من الطفولة وحتى دخوله معهد السينما ثم قراره بتركه رغم حلمه في الالتحاق به من قبل قائلاً: "من صغري كنت طالب في مدرسة ألماني كنت بحس إن الجو اللى فيها خانق زي معسكرات الجيتو، ولما كبرت ودخلت معهد السينما وفرحت في البداية جداً، قررت بعدها تركه لأني لاقيت نفس الجو اللى كان موجود في المدرسة هو بالظبط في المعهد، وبالتالي ما حبتش أكمل اما حسيت إنى مخنوق".
