لبلبة تحتفل بعيد ميلاد عادل إمام: أعماله محفورة في وجدان الناس
احتفلت الفنانة لبلبة، بيوم ميلاد الفنان عادل إمام، الذي يحل غدًا الجمعة؛ كونه من مواليد 17 من مايو لعام 1940، حيث تجمعهما علاقة صداقة ممتدة منذ سنواتٍ طويلة، كما تحرص على الاحتفال معه وسط عائلته وأصدقائه بشكلٍ شبه سنوي داخل منزله.
وقالت الفنانة لبلبة: "أنا عاوزة أقول حاجات كثيرة لعادل إمام وأقوله كل سنة وأنت طيب يا أحلى إنسان في حياتي، أنا عملت معاه أنجح أعمالي ودلوقتي النجاح معاه، وهو بفنه العظيم وإخلاصه لفنه جعل أعماله محفورة في وجدان الناس".
وأضافت خلال مداخلة ببرنامج الحياة اليوم مع الإعلامي محمد مصطفى شردي المذاع على قناة الحياة: "عادل إمام أنا عارفة إن سعادته أنه يسعد الناس ودايما كان يقولي شوفتي الفيلم الناس بتضحك وهي دي الحاجة اللي بتسعده".
وتابعت: كان مهم جدا بالنسباله إن الفيلم يعجب الناس، وأسعد أيام حياتي هي اللي اشتغلت معاه فيها عملنا أنجح أفلام مع بعض وهو اللي نزلني في التليفزيون، وبعد ما اشتغلت لقيت ولادنا في المسلسل بيجروا علشان يتفرجوا على نفسهم في المونيتور وجريت اتفرج معاهم قاللي بلاش عمر الفنان ما يعجبه نفسه كان بيعلمني".
واستكملت: "وحتى الآن لا يمكن أتفرج على نفسى، وهو ما يتفرجش كثير على أعماله وياما ساعدني في أدواره وكان بيبقى مبسوط جدًا لما يبقى معاه فنان ناجح وياما ساعد ناس وكان بيدينى إفيهات علشان أقولها وهو ادانى في فيلم احترس من الخط وقاللى على البتاعة دي قاللي إنها هتعلق مع الناس".
