«رفعت قضية ومش هسيب حقي».. تفاصيل «خناقة» سمية الخشاب ورامز جلال
شنت الفنانة سمية الخشاب هجومًا حادًا على برنامج "رامز جاب من الآخر" لافتة إلى الإصابات التي تعرضت لها ومازالت تعاني منها.
وكشفت الفنانة سمية الخشاب، عن الإجراءات القانونية التي اتخذتها ضد برنامج “رامز جاب من الآخر”.
«أنا رفعت قضية فعلا»
وزادت: "أنا رفعت قضية فعلا، ومن تاني يوم وأنا عاملة إجراء، وفي طلب للنائب العام إن ينظر للموضوع.. أنا متأكدة إن في ناس اتصابت ومش عايزين يقولوا عشان خايفين MBC تزعل منهم بس هي قناة محترمة وهي بتعرض البرنامج ومش الجهة المنتجة له.. انا يعني صحتي دي محدش هيزعل عليها؟ كله إلا الأذية".
وحول المشاهد المحذوفة من حلقتها مع أيتن عامر، قالت سمية الخشاب في برنامج "تفاعلكم": «هما قصوا كتير جدا ليا.. وأنا بقول رجلي بتوجعني وكتفي وجعني، ولحظة وقوعي كانت وقعة قوية بس هو قص كتير عشان ميبانش إن أنا اتصبت.. وأنا عندي تمزق في الأربطة في رجلي في كتفي ومش بعرف أحرك إيدي بارتياح".
سمية الخشاب في برنامج «رامز جاب من الآخر»
وأضافت سمية الخشاب: “اللي يزعل إن ولا حد منهم كجهة إنتاجية اتصل بالناس وقال سلامتكم أو آسف. هو إحنا في غابة يا جماعة؟. مش مهم الناس يحصلها إيه المهم أطلع أنور وأعمل مشاهدات عالية؟.. المهم مصلحتي والباقي يتحرق؟. إيه اللي بيحصل ده.. دي مهزلة لا يمكن السكوت عليها، الناس تؤذى في صحتها”
وتابعت سمية الخشاب: "ما أنا عملتها معاه 4 سنين قبل كده بس كنت عارفة إيه اللي بيحصل لكن المرة دي متقالش، عشان في تعمد للأذية يبقى أنت كدة متعمد تؤذي الناس، دي جريمة يعاقب عليها القانون.. قالي إنه برنامج عادي فورمات".
سمية الخشاب وأيتن عامر في «رامز جاب من الآخر»
وأشارت سمية الخشاب، إلى وجود العديد من الضيوف المصابين في البرنامج، قائلة:"متأكدة إن في تعمد في الأذية والدليل إن مفيش حد اهتم إنني اتصابت، ولما رحت للمستشفى قالولي إنت مش أول حالة، إمبارح جالنا 3 حالات من عند رامز. أقل حد اتصاب حصله كدمات متعددة في جسمه. معقول إنتوا عارفين بتكسروا في الناس كل يوم ومكملين تصوير؟. وقال أصل الناس ماضية على إنهم موافقين على جميع الملابسات والظروف الخاصة بالبرنامج. يعني إيه؟ أنا موافقة إنني اتكسر؟ أصلا مفيش عقد بيننا بس لو حتى فيه عقد، جسمنا ده مش ملكنا، ده ملك ربنا، فمش من حقك تؤذي جسمي صحيا ونفسيا وعصبيا، فده ضد حقوق الإنسان وضد القانون".
وشرحت سمية سبب نشرها صورة من البرنامج يوم عرض الحلقة: "الصورة اللي نزلتها كتبت عليها مش هسيب حقي منك يا رامز".
أزمة سمية الخشاب
وتابعت سمية الخشاب: "ساعة ما بتقعي مش بتحسي قوي بالوجع.. لكن بعدها حسيت بالوجع وكنت بعرج.. رجليا الشمال مكنتش عارفة أدوس عليها.. مبتلحقيش تاخدي نفسك في البرنامج.. كله مفاحآت وإنت مش مستوعبة اللي حصلك.. بعد ما خلص البرنامج قلتلهم رجلي وارمة وبعرج ومسنودة على صديقتي، رجعت الفندق قلتلهم ودوني المستشفى، قالولي لا أصل مفيش حد.. رحت المستشفى تاني يوم الصبح وعندي تقارير طبية مختومة وعندي كدمات متعددة وتمزق في الأربطة وكوارث.. لسه متعالجتش. أنا قعدت 10 أيام عشان أقدر أنزل وشلت الجبس عشان أرجع التصوير.. وبدوس على رجلي لحد اللحظة دي إن رجلي ما زالت وارمة. ليه ما زالت وارمة؟ عشان متعالجتش.. لو هتعالج هحط جبس ومش هعرف أصور المسلسل والمنتج هيروح في داهية.. إنت متخيلة الموقف اللي أنا فيه.".
ويشهد برنامج "رامز جاب من الآخر" الذي يذاع يوميا عقب أذان المغرب كالعادة أجواء من الرعب والتشويق والإثارة تجاه الضيوف، وقد أثار البرومو ردود أفعال إيجابية من جمهور ومُتابعي النجم رامز جلال في مصر والوطن العربي، نظراً لما احتواه من مشاهد تجمع بين الرعب والكوميديا في الوقت ذاته بسبب المغامرات المُثيرة وغير المتوقعة التي تواجه النجوم الذين وقعوا في فخ رامز.
وقع في فخ رامز هذا العام عدد كبير من نجوم الفن والرياضة والإعلام منهم، أحمد السقا، سمية الخشاب، باسم سمرة، حمدي المرغني، أيتن عامر، حسن شاكوش، نجلاء بدر، أحمد حسام ميدو، حمادة هلال، محمد رياض، باميلا الكيك، محمد شاهين، حسن عسيري، والعديد من النجوم الآخرين.
