الرئيس السيسي: «معايا أو مع غيري، إذا كنتم عاوزين بلدكم تبقى تمام ملكمش غير الصبر والعمل»
قال الرئيس عبد الفتاح السيسي: «عشان تصرف على قطاع البترول تريليون أو اتنين عشان ترجعه للخدمة تاني، عشان أخش في أزمة تاني مع الأشرار اللي مستهدفين البلد، وعارفين كل حاجة بيستهدفوها بتعمل كارثة لمصر لأربعين سنة، بقالنا أربع سنين بنعالج اللي حصل في 2011 و12 و13، الصبر والتحمل والعمل هو السبيل معايا أو مع غيرى.. أنا بكلمكم بجد والله، ربنا مطلع على قلوب الناس ونواياها وممكن الكلام يبقى شكله جميل، معايا أو مع غيرى، إذا كنتم عاوزين بلدكم تبقى تمام ملكمش غير الصبر والعمل».
وأضاف الرئيس السيسي، خلال تصريحاته بجلسة الطاقة، ضمن فعاليات مؤتمر "حكاية وطن": لما أجيب مشتقات بترول وأعملها في بنية التكرير والمصافي اللي عندنا وكانت متهالكة، ورفعنا كفاءات ودخلنا عشان إنتاجنا من السولار والبنزين والمازوت وحتى البيتومين، يبقى دا بتكلفة تقل من الدولار اللي بنجيبه، والعائد شغلنا الناس عندنا داخل مصر".
وتابع: "البرنامج كان كبير أوى وكل وزارة تكلف 1.8 تريليون جنيه، الرقم اللى بيتجاب دا من الوزير أو الحكومة يبقى 9 أو 10 تريليون جنيه هنجيبهم منين؟ لو عندك عوائد بزيادة هتجيب، اللى قبل كده كان بيخبوا الحقائق عن الناس أو مبيقولوش، أنا لازم أقول لناس كل حاجة عشان الناس واعية ودى بلدهم وبلدنا كلنا".
وواصل الرئيس السيسي: "زمايلنا جايين يحكوا الحكاية، أنا قلت لهم بس موضوع الكهرباء اللى بتتقطع، نقدر نخليها متتقطعش؟ اه طبعا، محدش يدارى وشه منها، نجيب منين، طارق بيبيع الغاز نسيبه يبيع عشان سيكسب ويدينا فلوس نحطها فى البنوك؟ لا عشان يجيب البترول اللى يخليه سولار وبنزين للناس، يوفر قد ايه كل شهر؟ 300 مليون دولار، يعنى الفرق دا شوية الكهرباء اللى بيتقطع 300 مليون دولار، يعنى 9 مليارات جنيه، يعنى 108 مليارات جنيه فى السنة، مين يدفعهم؟ طب مين يجيب 30 مليون دولار لطارق، مفيش مسؤول فى دولة بيقف يتكلم بالطريقة دى، أبدا، بس أنا متكلمش ليه، هو دا حكايتى ودا حالى، أنا أستعر من حالي؟ لا، دا حالنا ولازم نغيره ودا ضعفنا ولازم ننهيه، لازم، لازم".
واستكمل الرئيس السيسي: "أدى حكاية البترول والكهرباء واحنا داعمين يا طارق ودكتور محمد.. أحسن حاجة ربنا قالها، الصدق، خليك صادق وقول الحقيقة مفيش حاجة اسمها مواءمات سياسية فى ظروفنا، الناس فى مصر بقالها سنين طويلة متحملة مآسى وتعب، هم يتحملوا بس قولوا لهم، نسأل الله سبحانه وتعالى أن يوفقنا ويجعل فى الـ110 حفر بير استكشافى فيهم فرج لينا ودا الأمل اللي بنطلب من ربنا يساعدنا فيه، دا مش محسوب خالص، نقوله يا كريم يا غنى اعطف علينا".
جلسات مؤتمر "حكاية وطن"
ويتحدث في الجلسة الثالثة من جلسات مؤتمر "حكاية وطن"، كل من الدكتور محمد شاكر وزير الكهرباء والطاقة المتجددة، والمهندس طارق الملا وزير البترول والثروة المعدنية.
ويشهد اليوم الأول جلسات مهمة تركز على محاور الاقتصاد، ويشارك فيها كبار الوزراء، حيث يحضر الدكتورة هالة السعيد وزيرة التخطيط والتنمية الاقتصادية، ودكتور محمد معيط وزير المالية، وأحمد سمير وزير التجارة والصناعة، ودكتورة رانيا المشاط وزيرة التعاون الدولي، وتتناول هذه الجلسات سياسات وبرامج الحكومة في دعم الاقتصاد المصري.
أما عن اليوم الثاني، فيشهد جلسات تركز على قطاعات الطاقة والبنية التحتية، ويشارك فيها دكتور محمد شاكر وزير الكهرباء والطاقة المتجددة، والمهندس طارق الملا وزير البترول والثروة المعدنية ويتم خلال هذه الجلسات مناقشة مشروعات قومية كبيرة وجهود تطوير البنية التحتية.
بينما يشهد اليوم الثالث والأخير جلسات تركز على مجالات السياسة الخارجية والأمن القومي، ويحضرها سامح شكري وزير الخارجية والمستشار عمر مروان وزير العدل، واللواء محمود توفيق وزير الداخلية، يتم خلال هذه الجلسات مناقشة قضايا الأمن القومي والعلاقات الدولية.
فيما يتعلق بالجلسات المخصصة للعدالة الاجتماعية والصحة تشهد حضور خالد عبد الغفار وزير الصحة والسكان، ونيفين القباج وزيرة التضامن الاجتماعي، وسيتم ختام الفعاليات بجلسة ختامية تجمع كبار المسئولين لاستعراض نتائج المؤتمر والتوجهات المستقبلية للتنمية في مصر.
