حورية فرغلي: أبي انفصل عن أمي بعد 48 ساعة من ولادتي
باتت الفنانة حورية فرغلي حديث مواقع التواصل الاجتماعي بعد تصريحاتها الإعلامية التي تحدثت فيها حورية فرغلي عن مرحلة الطفولة القاسية التي مرت بها بعد انفصال والديها والذي جاء بعد 48 ساعة فقط من ولادتها.
قالت حورية فرغلي خلال لقائها مع الإعلامي تامر شلتوت، في برنامج in Deeb في العمق: إن انفصال والديها أثر عليها بشكل كبير، فلم تنطق إلا عند بلوغها 8 أعوام، وعندما عرضتها والدتها على الأطباء أكدوا لها، أن حورية تحتاج إلى المزيد من الحنان، لتعوض الظروف القاسية التي مرت بها في الطفولة.
طفولة صعبة
وأضافت : طفولتي كانت صعبة، بابا وماما انفصلوا وأنا عندي 48 ساعة، أكتر حاجة عايزة أنساها هي طفولتي، لأني أتحرمت من الطفولة والمراهقة.
وتابعت حورية فرغلي: الدادة بتاعتي كانت أحن واحدة عليّ، كانت فلبينية وقعدت معايا لحد ما بقى عندها 73 سنة وماتت، كنت بقولها ياتيتا، زوج ماما كان حنين عليّ، وزوجة بابا ماتت في غارة من غارات العراق لما كانت العراق بتضرب الكويت، ورأسها طارت قدام عيالها ماتت موتة صعبة.
خطيب حورية فرغلي
استعادت حورية فرغلي ذكرياتها، عن خطيبها الراحل، الذي ارتبط به بشكل كبير، رغم مرور 21 عامًا على وفاته، مؤكدة أنها لم تستطع أن تمحِ هذا الحب، وأن ترتبط برجل غيره.
وأشارت الفنانة حورية فرغلي إلى أنه كان يعاني من بعض الظروف الصحية، لكن رغم مرضه إلا أنها لم كانت تراه أجمل الرجال في عيونها.
وقالت خلال البرنامج: أنا شُفت الحب مرة واحدة في حياتي سنة 2002، مع خطيبي اللي توفى، ومن بعده محبتش حد تاني رغم مرور 21 سنة، خطيبي اللي مات كان 175 كيلو، وكان عنده مشكلة في رجله الشمال، فكان بيذق، وكنا قد بعض في السن.
وتابعت: رغم مرضه لكن كنت بشوفه أحلى راجل في الدنيا، والناس كلها تقول إيه الجنان ده، لكن مكنتش ببص لكلامهم بصيت لقلبه واللي جواه، كفاية أني سامعة صوته، كفاية وجوده في المكان ريحة برفانه، من ساعة ما مات وأنا مش لاقية حد غيره.
وأضافت حورية فرغلي: قضينا سنتين سوا متخانقناش مرة، كل ما أطلع الاولى في الفروسية أروح البيت ألاقية جايب لي تورتة كبيرة عليها صورتي ولعب، بدور على حبه مش لاقية، ساعات بقول لنفسي أنا شُفت الحب ده كله ليه لما في الآخر هيتاخد مني، لكن ربنا اللي عايز كدة.
واستكملت: من بعد وفاته مرتبطش بحد ولا حد أتقدم لي، رغم مرور 21 سنة مشوفتش زيه، مش عارفة ليه، بتحب كتير بس بتصدم لما أعرف السن، وفي شاب بعت لي رسالة طويلة يعبر فيها عن حبه لي، قلت له أنت عندك كام سنة، قالي 22 سنة قُلت له انت قولي يا طنط.
واختتمت حورية فرغلي: أنا معنديش صحاب ومبخرجش خالص، وبحب الحيوانات جدًا، كان عندي 13 كلب دلوقتي بقا 1، وعندي 8 أحصنة، مبخرجش مع الناس لان محدش بيعزمني على حاجة، اتعودت اعيش لواحدي وبراحتي، بيتهئلي لو أتجوزت مش هستحمل حد ينام جمبي على السرير، كمان هيبق في مشكلة، لأني بحب أمشي في شقتي براحتي واجري مع الكلاب، مش شرط كل يوم ميكب وشعر ورموش، أنا باكل ضوافري أصلا.
