«إلى صديقي».. كاتبة مصرية تدعو «ذا روك» لحضور ندوة أدبية بالقاهرة

بدر النحايفي

نشر الثلاثاء 12/سبتمبر/2023 - 03:00 م

وجهت الكاتبة منى ياسين الدعوة للمصارع الأمريكي المتقاعد دوين دوجلاس جونسون (ذا روك) لمناقشة كتابها يوم الاثنين المقبل بالمركز الدولي للكتاب.

وقالت منى ياسين على صفحتها الشخصية بموقع التواصل الاجتماعي فيسبوك لـ ذا روك: "أدعوك لحضور مناقشة كتابي "إلى صديقي".. يا دوب تلحق تحجز.. والبس كاجوال عادي مش شرط كلاسيك"

وحول دعوتها للصخرة الأمريكية ذا روك قالت منى: وسائل التواصل الاجتماعي بقى ليها مفعول السحر، وتقدر تقرب البعيد فقررت أقدم دعوة لـ الروك (المصارع سابقا والممثل حاليا) لحضور مناقشة كتابي (إلى صديقي) وخاصة إنها هتكون في القاهرة مش في المنصورة (بلدي) مثلا، يعني ده هيسهل عليه الحضور من وجهة نظري، ينزل من الطيارة، يركب تاكسي للمركز الدولي للكتاب.

وأضافت: "لو حب ذا روك يقضي يومين في القاهرة، أبقى كده عملت نوع من تنشيط السياحة الداخلية، ومستعدة وقتها أقوم معاه بدور المرشدة، لأني عاشقة للمناطقة الأثرية في بلدي وزرت معظمها تقريبا فعندي خبرة كويسة في المجال ده".

وتحدثت عن علاقتها بـ ذا روك قائلة: " أنا متابعاه من أيام ما كان مصارع وسنه صغير، وكان بيخسر عادي وكانت جولاته مع الحانوتي مميتة أحيانا كثيرة لكني كنت بشجعه طول الوقت.. كنت بحس إنه بيلعب بنبل مش بخبث ولا بعدوانية

وتابعت: "بعد كده لما اعتزل واتجه للتمثيل كنت مبسوطة إن بقى فيه مساحة أقدر أشوف انفعالاته فيها وتعبيرات وجهه، ده غير إن اختياراته للأفلام جميلة فعلا".

وترى منى أن روك على المستوى الإنساني متواضع وفخور باللي وصله، ومقدر جميل كل حد ساعده في الأول، وده بان مثلا لما قدم سيارة لأستاذه وسيارة للدوبلير بتاعه، وقالت: "عمل لايف من فترة كان بيقول فيه أن عمره ما هيتضايق من الشهرة ومن حب الناس لأنه تعب جدا علشان يوصل لده".

سبب دعوة روك

وأوضحت الكاتبة منى ياسين: "من ضمن حاجات خلتني أكتب له الدعوة إني شوفت فيديوهات كتير كان بيحضر فيها لناس حبوا يشوفوه، منهم طفلة ومنهم لاعب مبتدئ مثلا فقلت وقتها "طيب وليه لا! ما يمكن فعلا يلبي دعوتي"

وشرحت علاقتها بـ روك قائلة: "هو بالنسبة لي شخصية مُلهمة جدا وبعتبره الكراش بتاعي من وأنا في ثانوي تقريبا، ولسه لغاية دلوقتي،؛ لما أنتيمتي تلاقيني في مود مش حلو يكفي إنها تبعتلي صورته، أو تعرفني إن له فيلم في التليفزيون مثلا، وقتها مزاجي بيتبدل تماما فعلا.. أوقات كتير بيكون هو البطل اللي تخيلته وأنا بكتب إحدى قصصي مثلا

واستطردت: "مؤخرا بدأ ينزل فيديوهات ليه كأب مع بناته الصغيرين، وقد إيه مشاهد مُحببة للنفس وأتمنى يكون قدوة لكل أب بيتابعه، هو مثلا بيسلم نفسه لبناته تمامًا؛ فيه منهم اللي تحط له ميك أب أو تلزق على صلعته استيكر وهو بيصور ده بكل محبة واعتزاز بأبوته، ولو سايق عربيته وفيه إشارة ممكن ينزل الزجاج علشان العربية اللي جنبه تشوفه، فيلقي عليهم التحية ويفضل سايق بهدوء لغاية ما كلهم يتصوروا بموبيلاتهم زي ما هم عايزينن واللي مش واخدين بالهم منه هو ممكن يشاور للناس فينبههم ليه.

فحقيقي لو حضر مناقشة كتابي (إلى صديقي) يوم 18 سبتمبر بإذن الله هكون مبسوطة جدا.. لأني بعتبره صديقي المُلهم.

تجربة منى ياسين الإبداعية

بدأت منى ياسين الكتابة منذ المرحلة الجامعية في نادي أدب جامعة المنصورة، ثم التدوين على بلوجر في 2008 وأول كتاب أصدرته جاء عام 2012 بعنوان (خبايا نسائية)، وتلا ذلك ستة إصدارات ما بين مجموعات قصصية ورواية وأدب رسائل ونصوص سردية منوعة.