فريدة سيف النصر: «قررت خلع الحجاب لأن معنديش حد يصرف عليا»

الفنانة فريدة سيف النصر تصدرت الترند في الساعات القليلة الماضية عقب تصريحاتها في برنامج "كلمة أخيرة"، عبر شاشة "on e"، والذي تحدثت من خلاله عن أسرارها الفنية والشخصية. 

قالت فريدة سيف النصر:"وأنا ببص على شريط العمر بقول الحمد لله كان طريق مش سهل وكله مطبات واتشال من أدوار وحاجات، إن الله مع المنكسرين جابر".

وتابعت فريدة سيف النصر"مشواري وقعت وقمت فيه، اتظلمت كتير وربنا نصرني، إني كنت حلوة أوي في فترة الثمانينات مش مشكلتي دي بتاعة ربنا".

فريدة سيف النصر وأفلام المقاولات

وأضافت الفنانة فريدة سيف النصر خلال البرنامج:"أنا معملتش أفلام مقاولات ودي كانت محاولة علشان يهدوا اللي أنا عملاه ويقللوا المرحلة الناجحة بتاعتي، ولكن ده تاريخ مصر السينمائي". 

أحلى أدوار فريدة سيف النصر

ولفتت فريدة سيف النصر:"أحلى دور جوا قلبي عامل علامة كان فيلم "بدون ذكر أسماء"،  الأستاذ وحيد حامد كان بيتحارب علشان معملش الشغل ده وجاء تامر محسن أصر علىّ.

وكشفت فريدة سيف النصر مؤامرات ضدها من فنانات كبيرات قائلة:"اتشلت من أفلام وأدوار مهمة بسبب نجمات كبار بحجة إني جميلة وهغطي عليهم".

فريدة سيف النصر والحجاب 

وحول ارتداء الحجاب قالت فريدة سيف النصر :"اتحجبت وابتعدت عن التمثيل حوالي 9 أشهر، وقتها اتمارس على ضغوط كبيرة من بعض النجمات، علشان كنت حلوة وعندي قبول".

وأشارت:"أنا بخاف من الموت جدا وجبانة، وفاة أخويا الصغير اللى كان شاب طول وقمر وكان أصغر واحد فينا هزني جامد لإنه كان عمره 21 سنة واتخطف بدري ومقدرتش أشوفه وهو بيتدفن في قبره، بعدها اتحجبت، كنت بقعد أنا والفنانة نورة نقعد نقرأ قرآن، ومشيت في طريق الحجاب لمدة 9 شهور، وقررت خلع الحجاب لما دخلت مع محجبات لما حسيت إني لازم أنزل أشتغل وكنت وقتها اتطلقت ومعنديش حد يصرف عليا ومكنش ينفع انزل اشتغل بالحجاب ولا بالباروكة علشان الناس شايفني بشكل معين".

فريدة سيف النصر وحب الرقص 

واعترفت فريدة سيف النصر قائلة :"أنا كنت بحب الرقص جدا ودايما يجيبوني من مسرح المدرسة وأنا برقص وبغني وأمثل، ناظرة المدرسة قالت لأمي وقتها لمي بنتك بدل ما تلاقيها رقاصة، ومن هنا بدأت أمثل وفريد شوقي ونور الشريف بصوا لي وقالوا لي عنيكي دي بتقول إنك هتبقي ممثلة جامدة، ولما عملت فيلم الضحايا أول عمل ليا، أخدت كمية أفلام كبيرة وطلعت مع سمير غانم وجورج سيدهم في عروضهم المسرحية".

وتابعت :"أنا اللي حطيت نفسي في حتة البنت اللعوب في الأفلام واغرتني هند رستم لما قالت أنا بشوف إن فريدة سيف النصر ممثلة إغراء، علشان دخلت في المنطقة دي".

 فريدة سيف النصر ومشهد الفرخ 

وقالت فريدة سيف النصر:"الشباب لسه فاكريني بمشهد الفراخ مع عادل إمام، وانا بقولهم يا شباب أنا عديت الستين خلاص هو أنا هتحنط وأفضل زي ما أنا".، وقالت:"أنا ضد عمليات التجميل وعمري ما عملتها ولا هعملها، هاتولي حد عمل عمليات تجميل وبقى حلو.. والبوتكس نوع من سم التعابين".

دموع فريدة سيف النصر

وبكت فريدة سيف النصر علي الهواء، بعد رؤيتها لمشهد من دروها في مسلسل"عملة نادرة"، قائلا:"حسيت إن الشخصية أمي مرت بيه وناس كتير بحبهم، فكنت مشحونة".