الرئيس السيسي عن صندوق الزواج : «أنا متابع.. وقالوا إلحق قبل ما ياخد مننا 30 ألف جنيه»
تحدث الرئيس عبد الفتاح السيسي عن صندوق الزواج، خلال احتفالية تكريم المرأة المصرية والأم المثالية، قائلا: "كان تقديري وما تحدثت به عن هذا الصندوق ولقيت بعدها طلبات الزواج كترت جداً قالك ألحق قبل ما السيسي ياخد مننا 30 ألف جنيه.. ماأنا متابع بقى.. والكل قالك نجوز العيال قبل ما يحصل كدا".
الهدف من إنشاء صندوق الأسرة المصرية
وأوضح الرئيس السيسي، خلال كلمته فى احتفالية تكريم المرأه المصرية والأم المثالية لعام 2023، إن الهدف من إنشاء صندوق الأسرة المصرية، حال وجود انفصال، هو عدم وجود عوز واحتياج، مضيفا بالقول: "الصندوق هدفه أن الأسرة لما يحصل لا قدر الله الخلاف وينتهي بالانفصال، البيت ميبقاش فيه عوز وحوجة، والست متبقاش محتاجة بغض النظر عن قدراتها واحنا كدولة نقدر وليه اخلى كل بيت سواء كان الاب يبقا شايل هم بنته ولا اخوها ولا هي ازاى يعني؟ ..لما اعمل الصندوق واحط فيه موارد وقلت الرقم اللى هيحطوه الزوج والزوج هيتحط قدام منه رقم مشابه بالظبط".
وتابع الرئيس: “مطلوب مننا محدش يلوى كلامي، ولازم تعرفوا إن استقبال الناس للكلام مش زي بعضه ولا بأس.. بحاول أفهم الدولة إنها تتصدى لمشاكل وتحديات تعاني منها من خلال منظومة بتتعمل ونقعد نقول ونرفع قضايا في المحاكم ونعمل كذا .. طيب والأسرة تعمل إيه في الوقت ده؟.. افتكروا مرة من سنين كنت بتكلم مع رئيس هيئة الرقابة الإدارية قبل كده وقلت عاوز يجي عليا في مصر إذا أسرة فقدت عائلها واحنا بنطلعله شهادة وفاته نكون بنطلعله إجراءات معاشه .. كانت الفكرة ان البيت ده ميتهزش ابدا .. طيب ازاى؟ بكلمتين حلوين؟ ولا نعمل إجراءات كدولة في النهاية تحقق اللى احنا بنقول عليه ".
