أحمد وفيق: «مبحبش حد يعاملني كممثل».. فيديو
تحدث الفنان أحمد وفيق، عن الشخصيات الصعبة التي قدمها في الدراما، وكيف تأثر بها وأثرت على شخصيته، مُؤكدًا أنه لا يحب أحدًا من أصدقائه الممثلين يعامله كممثل.
وقال وفيق، في برنامج “سبوت لايت”، المعروض على قناة “صدى البلد”، من تقديم الإعلامية شيرين سليمان: “بعتبر الممثلين اللي واخدين التمثيل بجد أوي بيكونوا لابسين الشخصية، وينسوك شخصيتهم الحقيقية زي باسم سمرة وماجد الكدواني والنوعية دي، لما بتسيب نفسها في الأدوار دي بيتأثروا”.
وتابع: “على مستوايا الشخصي الأدوار اللي بيبقى فيها أكتر من طبقة نفسية أو مركبة بتأثر بيها، ومنها تحت السيطرة وسقوط حر، فالعمل الأول قدمت فيه دور مريض إدمان، ويترتب عليه أكتر من أمراض، ده مركب، وكان عندي مسلسل تاني مع نفس الشركة المنتجة مع جمال العدل في الوقت نفسه، ورفضته وقولت له مش هقدر أعمل المسلسل التاني ده، فلقيته بيستغربني، وقالي هو في حد يرفض الفلوس دلوقتي”.
واستكمل وفيق حديثه: “بعد ما أتفرج على أول حلقتين لقيت جمال العدل بيكلمني، قالي أنا عرفت ليه مرضتش تعمل العمل التاني”.
وأضاف: “في سقوط حر كنت بعمل دور مركب، وأكثر حساسية، دور مريض البارانويا، وده صفة مش مرض، وتتحول لمرض لما تتضطرب، وهو مرض صعب علاجه، لأن المريض صعب يعترف به ويتعالج عن بعد، وده بيسيب تراكمات عليك، وأنا بعيش أحمد وفيق لفترات ومش هتلاقيني منتشر، وده مش تعمد ولكن أنا بزهق إني ممثل، وأنا من النوعية اللي مبحبش حد يعاملني كممثل”.
