حسن يوسف: «كنت هعتذر عن فيلم للرجال فقط وقبلته وأنا متضرر»

قال الفنان حسن يوسف "إن فيلم "للرجال فقط" ليه حكاية غريبة معايا، أنا مش بحب أتغرب كتير عن بيتي، ولما أتعرض عليا الفيلم وعرفت إننا هنقعد 15 يوم ويمكن أكتر فى رأس غارب حاولت أعتذر، لكن صديقي جمال الليثى وسعاد حسني ونادية لطفي أقنعوني"، جاء ذلك خلال مداخلة هاتفية لبرنامج فن مشكل تقديم ليلى بدران على شعبي اف ام. 
وأضاف، “قبلت الفيلم وأنا متضرر، لكن خرجت من الفيلم بأسعد أيام حياتي فى الوسط الفني، لأننا كنا فى الـ 15 يوم عيلة واحدة، وامتدت المدة لـ 21 يوم، وخصوصا إن المخرج محمود ذو الفقار ومدير التصوير على خير الله من أظرف الناس في الوسط الفني”.
وتابع، “كنا حاملين هم نادية لطفي وسعاد حسني يتخانقوا مع بعض لأن المنافسة بينهم كانت شديدة، لكن بقوا أصدقاء جدا وخيبوا ظننا، وكنا بننام فى هنجر من الألمونيوم مش فى فندق، وكنا بنفطر ونتغدى ونتعشى مع بعض وطول اليوم فى التصوير مع بعض، والجديد علينا كان الفنان إيهاب نافع، كان لسه بادئ في التمثيل، ومش أصدقاء أوي، عشان كده حاولت أكسر حتة الغربة فى روحه، وبقينا أصدقاء”.
وعلى فكرة الفنانة نادية لطفي مفيش إتنين يختلفوا على جمالها، وشخصيتها جميلة جدا وجدعة جدا، وبتاخد مواقف مفيش راجل يقدر ياخدها، ودمها خفيف أوي في الشغل، وفضلنا أنا ونادية أصدقاء وبنتكلم لغاية قبل ما تدخل فى الغيبوبة بيومين، وأجمل حاجة فيها إنها كانت فرفوشة وبتحب تطبخ أكلات غريبة.
واختتم قائلا: “طلعوا عليها إشاعة إنها مش مصرية، لكن هي مصرية بنت بلد، مولودة فى ثروت باشا فى إسكندرية، وأنا بنتهز الفرصة عشان أقول لإخواننا الأقباط كل سنة وأنتوا طيبين والوطن بيجمعنا، وكل سنة وأنتوا طيبين جميعا بمناسبة العام الجديد”.