عفاف شعيب: «شائعات الوفاة مؤذية والموضوع مينفعش يتسكت عليه»
انتقدت الفنانة عفاف شعيب شائعات وفاتها على مواقع التواصل الاجتماعي وأنها على مدار ثلاث سنوات يطلقون الشائعات بوفاتها، ومن قبل ظهرت شائعات على ميرفت أمين، والراحل هشام سليم تخرج عنه الشائعات منذ عام والزعيم عادل إمام.
وتابعت -خلال تصريحات تليفزيونية -: “إشمعنا الجيل بتاعنا القديم تطلع عليه الشائعات وهي أفكار شيطانية وناس فاضية والموت والحياة بإيد ربنا كلنا هننتقل محدش هيخلد فيها بس ليه كده ؟”.
واصلت: "الدنيا اتقلبت بعد الشائعة والناس قعدت تكلمني وتبعتلي وتقلي انتي بخير ؟ لان الشائعة اتعملت بكل تفاصيلها وأن الجنازة خرجت ربنا يسامحهم".
ولفتت إلى أنها هاتفت نقيب المهن التمثيلية الدكتور أشرف زكي واخبرته بضرورة التحرك ووكل محامي النقابة باتخاذ الإجراءات القانونية، قائلة:" الموضوع معدش يتسكت عليه ".
وحول جدل جلب ملابسها من الخارج قالت: "معلش ومش عاوزة حد يزعل مافيش مقاس في الصناعة المصرية مظبوط في المقاسات أنا بقيت بلف مصر كلها عشان اجيب بلوزة وأو جاكت أو بنطلون وبجيب من محل بيجيب ملابس ألماني و هو الوحيد المظبوط، ولبسي شيك ومحترم، مبلاقيش البدل اللي أنا عايزاها إلا في الملابس الألمانية، هما عاوزني أمشي مجربعة ولا إيه".
وعن عدم تكريمها في مهرجان الدراما قالت: "مش أنا الي زعلت على عدم التكريم بس الناس الي زعلت وفيه ناس أتصورت معايا وقالولي أنتي اصل الدراما العربية ولم يتم تكريمك ومش أنا بس يعني كفاية أن الفنان الكبير رشوان توفيق لم يدعى ولا عفاف رشاد والمفروض كل ذي حق يأخذ حقه".
