أول تعليق لميرفت أمين على تصدرها التريند: «صايدني طول الوقت»

علقت الفنانة الكبيرة ميرفت أمين عن تصدرها التريند بعد ظهورها الأخير في عزاء المخرج علي عبدالخالق، قائلة: "مش عارفه ليه صايدني طول الوقت، ولكن ما حدث جعل هناك موجة حب وجميلة من الجميع الحمدلله".

وقالت "ميرفت" في مداخلة هاتفية لبرنامج "مساء دي إم سي" على فضائية "دي إم سي" اليوم الأربعاء: "من حوالي 10 أيام قالوا ميرفت أمين توفت إثر وعكة صحية، وبعدها كبروني كام سنة وقالوا تزوجت"، موضحة: "عايزة أقول لمروجي الشائعات أن لا الموت ولا الجواز بيستخبوا ومنقدرش نخفيهم".

وتابعت: "بيتكلموا عن شكلي في عزاء المخرج الراحل علي عبدالخالق، وإن شكلي مهموم وكبرت، طب هل مطلوب مني في العزاء أكون حاطة ميك أب ولا مطلوب مني أروح ازاي ؟".

وأردفت: "أنا اتعودت على الشائعات ومش بيفرق معايا لكن اللي حوليا بضايق عشانهم لأن في ناس متواصلة معاهم على طول أو لأي أسباب مش بكلمهم أو بنتي تكون في مكان يوصلها كده أكيد هيتخضوا"، متسائلة: "ليه الأذية في مشاعر الناس وليه الخصوم؟".

وأكدت "ميرفت" أنها تعكف الفترة الحالية على قراءة عملين درامين، ولكنها لم تنته من قرارها فيهم، قائلة: "معروض عليا حاجتين والاتنين شكلهم يفتحوا النفس إن شاء الله".