«الريتش واقع».. هجوم على مريم سيف بعد إعلان طلاقها

تحولت البلوجر مريم سيف إلى حديث مواقع التواصل الاجتماعي، عقب إعلان طلاقها من زوجها محمد شرف، فيما كشفت مريم سيف أن زوجها لم يكن ينفق عليها، أو على ابنتيهما، وتتحمل بمفردها نفقات البيت، إضافة إلى تخليه عن الوقوف إلى جوارها أثناء مرضها.

مريم سيف التي يتابعها ما يتخطى مليوني ونصف المليون متابع على السوشيال ميديا، بسبب صورها الرومانسية مع زوجها، فضلا عن عبارات الحب والغزل من كل منهما للآخر، صدمت جمهورها وهي تكشف عن الجانب الآخر من حياتها المظلمة.

كتبت مريم سيف تقول: "كنت ونعم الزوج قبل ما تكون أناني.. وقبل ما أدخل في غيبوبة ومتقفش جنبي.. قبل ما بنتك تتعب ومتبقاش معانا.. قبل ما كل مليم يجيلك تصرفوا على الغريب قبل القريب.. أنت مقدرتش نعمة بنتك.. أنا أكتر واحدة مصدومة فيك.. وقفت جنبك 3 سنين وضحيت بكل حاجة عشانك.. وأنت يوم ما يجيلك شغل رمتني أنا وبنتك".

وأضافت مريم سيف في "ستوري" آخر: "كنت ساكتة ومحبتش أخرب بيتي.. ومن يوم ولادة بنتي أنا المتكفلة بكل مصاريف البيت.. أنا أول مرة هقولها في العلن.. أنا بحلل كانسر ومقلتلوش.. أصل هتسند على مين".

تسجيلات صوتية 

ونشرت مريم سيف تسجيلات صوتية توضح فيها ما حدث بينهما من مشاكل في العلاقة بينهما، ما جعل متابعي مريم سيف يعبرون عن صدمتهم الشديدة من تطورات الأمور بين الزوجين، حيث قالت إحدى المتابعات "قصة مريم سيف ومحمد شرف دي مرعبة وتقلب الحال 90 درجة ده خوفني من الخطوة أكتر ما أنا أساسا خايفة".

وكتبت متابعة أخرى تقول: "أنا مصدومة من استوريز مريم سيف، مفيش أي ضمانات لأي حاجة فعلًا.. كمية طاقة سلبية على الصبح أخدتها من استورى مريم سيف أقسم بالله تكفي بلد، حاسة قلبي هيتفجر من الزعل بجد والله العظيم".

الهجوم على مريم سيف

وتعرضت مريم سيف إلى هجوم من بعض المتابعين حيث قال أحدهم: "التايم لاين مقلوب على مريم سيف الدين ومحمد شرف، وأنا مش مستوعبة كمية الناس اللي كانت حطاهم قدوة ويقولك اتعقدنا وبتاع.. أنتو عبط يا جماعة؟!.. بتصدقوا وبتحطوا بلوجرز قدوة ليكم فحاجة مصيرية زي دي!".

وقالت متابعة أخرى: "مريم سيف إيه بس اللي عشان عندها مشاكل أملكوا فالعلاقات الكويسة باظت مين قال إن مريم وجوزها Standard أصلا.. ده لو أصلا عندهم مشاكل مش الريتش واقع، وحتى لو دي ضريبة الحياة اللي كل فسفوسه فيها على الإنستا والفيس مكنتش متوقعة غير كده خالص".