مصطفى قمر: «لو أنا نقيب الموسيقيين كنت هراجع كلام بعض الأغاني»

احتفل راديو "إنرجي 92.1" بالفنان مصطفى قمر الذي كان نجم شهر مايو، في حلقة اليوم الثلاثاء، مع سلمى قاسم، وعلى مدار ساعتين كشف قمر العديد من كواليس أعماله.

وكشف قمر عن تحضيره عددًا من الأغاني الفترة القادمة، قائلًا: «في أغنية سينجل سيتم طرحها في الصيف باسم «وصلولوه إنه غايب»، بجانب المزيد من الأغاني الجاري التحضير لها والتي ستطرح على طريقة الفيديو كليب».

وكشف مصطفى قمر تفاصيل أزمة برنامجه «5 نجوم»، قائلًا: «بعض الأمور وصلت للمحكمة الآن والدعاية ماعجبتنيش ولازم أخد حقي ويكون في اعتذار عن اللي حصل بخصوص الدعاية، وسأقدم كل الأوراق التي تثبت حقي».

وعن السينما وآخر أفلامه «فين قلبي»، قال إن الفيلم تعرض للظلم، وأوضح: «أنا قدمت اللي أنا عايزه والفيلم اتّعب فيه جامد وحاليًا سيتم عرضه في أكثر من قناة».

وتابع مصطفى قمر أنه كان من المقرر له أن «يشارك في السباق الرمضاني الماضي، ولكن بسبب تأجيل التصوير والتأخير في بدء التحضير الجيد للمسلسل تم تأجيله وتغييره فكرته».

وعن الأعمال الغنائية التي قدمها ومنها أغنية «زحمة الأيام»، قال: «بعتبرها اتعملت لتكريم الشاعر سامح العجمي والملحن أشرف سالم اللي توفيا وإحنا شغالين على الأغنية، وكنت متأثرا جدا وإحنا بنصورها، الجمهور كان في حاجة إلى هذا التعاون».

وخلال الحلقة عرضت سلمى عددا من الأسئلة على مصطفى قمر، بعنوان «لو كنت»، في هذا المنصب أو الموقف كيف سيكون قراره، وهنا قال قمر: «لو كنت نقيب المهن الموسيقية كنت هراجع على الكلام الخاص في بعض الأغاني، لكن المزيكا مكانتش هتدخل فيها، مفيش نوتة قليلة الأدب، ولو كنت منتج قدم أغنية تجمع كريم قمر ونور النبوي، ولو هنتج كليب كتير إني أحط ميزانية 3 أو 4 ملايين ولكن لو في رعاة ممكن أعمل كده وأحاول أرجع الفلوس دي عن طريق المشاهدات».

وأضاف: «لو كنت أغنى واحد في العالم هساعد الناس اللي في المجاعات، والحيوانات هيكون ليها نصيب من المساعدات».

وقال قمر: أغنية «يا طبطب يا ادلع اتعرضت عليا بس قولت لأيمن بهجت قمر وطارق مدكور يدوها لنانسي عجرم.. حسيت إنها لائقة عليها وفعلا كسرت الدنيا معاها».

وتابع: «هنقول إحنا لسة حبايب خدتها من عمرو مصطفى وبعدها قالي إن عمرو دياب عايز يغنيها فقولتله ياخدها بس لو مش هيقدمها هاخدها تاني.. وعمرو دياب غناها فعلا مرة في حفلة ومحسهاش».

وعن السوشيال ميديا ومطربي الراب، قال مصطفى قمر: «مش دايما بتابع السوشيال ميديا.. حاجات كتير مبتعجبنيش لأنها بتبقى متحررة أوي، وأوقات كتيرة مش بتعجبني فيديوهات التيك توك».

وبتعليقه على أغاني الراب، اختتم: «ويجز ومروان بابلو والناس دي عاملين شغل كويس لكن الموضوع تطور وبقى في شتيمة في الأغاني ودي حاجة مش مقبولة ومش مفهومة بالنسبة لي.. الفن ألذ من كده بكتير».