أحمد عبد العزيز يوجه رسالة لـ توفيق عبد الحميد بعد إعلانه اعتزال الفن

هنأ الفنان أحمد عبد العزيز جمهوره بمناسبة شهر رمضان الكريم، قائلًا: "كل سنة وكل مستمعين شعبي إف إم طيبين، وأنا قعدت حوالي 11 سنة كل سنة ليا عمل في رمضان وكلها أعمال متميزة لاقت قبول واستحسان من الجمهور بشكل كويس".

وأضاف عبد العزيز - خلال مداخلة هاتفية لبرنامج "اللمة تحلى" على إذاعة "شعبي إف إم" والحلقة من تقديم شيماء السباعي -: "مسلسل الفرسان كان صعب عليا من ناحية ظروف العمل وأخد وقت طويل في التصوير حوالي 9 شهور وكان صعب لأن تصويره كان معظمه خارجي وأخد مجهود كبير كمان، والسيرة الهلالية الجزء الأول ولا إله إلا الله الجزء التالت خدوا مجهود كبير جدًا".

وعلق على ورش الكتابة قائلًا: "ورشة الكتابة ممكن تكون حاجة حلوة تضيف للعمل وتغني العمل لأن هيشترك فيها تلاتة أو أربعة لكن بشرط يقعدوا مع بعض وقت طويل يبقى عندهم مساحة كافية من الوقت إنهم يناقشوا العمل ويناقشوا تفاصيله المختلفة، ومفيش مشهد كان ينطبق تماما على حياتي الشخصية". 

وتابع أحمد عبد العزيز: "وعن الكوميكس اللى بتطلع عليا على السوشيال ميديا بتضحكني وبشوف اللي عمل الإفيه ده عمله من أنهى زاوية وفي معظم الأحوال بيبقى ألاقيه لايق ومظبوط فبتضحك، والحمد لله كل التعليقات اللي بتكتب عنى على السوشيال ميديا سواء على صفحتي أو صفحات الأخرين كلها بتبسطني جدًا لأنها إيجابية وجميلة ومشجعة".

واختتم أحمد عبدالعزيز برسالة للفنان توفيق عبد الحميد بعد إعلان اعتزاله بعد مسلسله الأخير، قائلًا: عيد التفكير في هذا الموضوع مرة أخيرة عشان خاطري وعشان خاطر الناس اللي بتحبك ومتحرمناش من إنك تكون موجود معانا".