نيرمين الفقي: «أمي كانت بتطفش العرسان مني عشان خايفة عليا»

أعربت الفنانة نيرمين الفقي، عن سعادتها بالمشاركة كضيفة شرف في مسلسل "الكبير أوي 6" لأحمد مكي، قائلة: «النهاردة استمتعت استمتاع غير طبيعي، كل الناس كانت هايلة ده غير إن مكي تحسيه من جواه تلقائي موهوب وكان نفسي أكمل أكتر».

وأضافت نيرمين الفقي - خلال مداخلة هاتفية لبرنامج "اللمة تحلى" على إذاعة "شعبي إف إم" والحلقة من تقديم شيماء السباعي -: «أول حد لمتي بتحلى معاه أهلي وعيلتي، بعد كدة صحابي الصحاب اللي بجد لأن فيه صحاب بجد وفيه صحاب وأوي أوي دول فأنا برتاح مع الناس الطبيعية التلقائية اللي بنحب بعض بجد ومن قلبنا، وأنا مقلة في أعمالي وده مش بيكفي حسب الأعمال اللي بتتعرض عليا ولأنى بنتقي أدواري ومفيش فنان بيقعد في البيت بمزاجه».

وتابعت: «كل أعمالي أرهقتنى إحنا مهنتنا صعبة للغاية وكل عمل بيأخد من صحتنا وعمرنا وبياخدنا من أهالينا وبياخدنا من حاجات كتير أوى، وافتكر كنت بعمل آخر جزء في مسلسل نصيبي وقسمتك كنا بره بيتنا حوالي 36 ساعة وفي أبو العروسة من التعب بعد ما خلصت روحت المستشفى».

واستكملت: «بحاول أغير جلدى وأعمل أدوار متنوعة وحاولت بشتى الطرق إني أبين موهبتي حسب العمل اللي بيتعرض عليا، وكذا حاجة ممكن تكسرني إن أنا لو اخترت بني أدم سليط اللسان أو ممكن يمد ايده عليا أو إن الراجل المرتبطة بيه يحسسك إنك ولا حاجة كل دية حاجت تكسر أي ست». 

وعن والدتها قالت: «أمي الله يرحمها كانت بطفش العرسان مني لأنها كانت متعلقة بيا وكانت صاحبتي أوي وتحولت إلى بنتي لما تعبت وكانت بتخاف عليا أوى خاصة إن علاقتها بوالدي مكنتش حياة طبيعية وانفصلوا فكانت خايفة عليا أوى إن أنا ممكن اتأذى».