نيللي: أنا اتولدت في البلاتوه.. وبعتذر عن أعمال بالملايين

تحدثت الفنانة الكبيرة نيللي، خلال حوارها في برنامج على اللوكيشن الذي يذاع على راديو هيتس والبرنامج من تقديم شريف الليثي، عن أجمل أيام حياتها وعلاقة ارتباطها بالفوازير وعن كواليس دخولها عالم الفن. 

وقالت: “أحلي حاجة في حياتي وأحلى ذكريات عمري هي الفوازير، ومن سعادتي بالفوازير مكنتش بحس بالتعب ومكنتش بنام وعلى قد التعب على قد الفرحة، وأول دخول للوسط الفني كان عندي 4 سنين ووقتها كانت فيروز أختي المعجزة نجمة، ومخدتش قرار دخول الفن ودي حاجة حصلت لوحدها فأنا اتولدت في البلاتوه”.

وأضافت الفنانة نيللي: “طموحي هو اللي أنا وصلتله بالفعل، وأسعد لحظات حياتي الفوازير بفتكرها علي طول، والشغل بالنسبالي تضحية، أعمل أي حاجة عشان شغلي، وكنت بتبسط أوي لما الناس بتوقفني وتتصور معايا من صغري، وأنا كل شوت بعمله كان من قلبي ومن جوايا من إحساسي فلازم يوصل للناس". 

وتابعت: “عيبي مواعيدي المظبوطة أوي وده عيب مع اللي مواعدهم وحشة، وأنا مابتهمنيش الفلوس ومابتفرقش معايا، ودلوقتي بعتذر عن أعمال بالملايين وأنا عمري ما أخدت الأرقام دي زمان، وأكتر فيلم بحبه أنا وأنتي وساعات السفر”.

واختتمت بالقول: “أكتر كلمة بقولها الحمدلله، وأحسن وأقرب عمل لقلبي الفوازير، ومبدأي في الدنيا الإخلاص والثبات والعطاء، ولو مكنتش فنانة كنت هبقى فنانة”.