بشرى: «ولادي جابولي فوطة هدية عيد الأم »
قالت الفنانة بشري “إن نماذج الأم في السينما المصرية كثيرة جدا، من أشهرهم الأساتذة أمينة رزق، فردوس محمد، ماري منيب، والأمهات النهاردة اتغيرت كتير مع الزمن وبقوا مودرن، لأن فيه أمهات كتير سنهم صغير، وفي أمهات كتير مابتحبش تحس أنها كبرت”.
وتابعت في تصريحات إذاعية: “ما ينفعش نلخص دور الأم العظيم المقدس في مجرد اسم، الأم دي هي الوتد اللي بتلم الأسرة، واحلي حاجة في بنتي إنها بتحب تكتب، وأنا مش مع الفكر الاستهلاكي وانه لازم نجيب هدية، المهم إن ولادك يفتكروك ويقدروا تعبك معاهم”.
وأضافت: "ابني وبنتي جابولي فوطة حلوة أوي مكتوب عليها "كل سنة وانتي طيبة يا ماما"، لأنهم عارفين إن أمهم بتحب الهدايا العملية، وأيوه ممكن كلهم يستخدموها، بس في الآخر اسمي مكتوب عليها".
واختتمت: “بعد ما خلفت بقت الأولوية دايما لابني وبنتي، وفي أمهات كتير بتنكر ذاتها عشان خاطر أولادها”.
