كواليس لقاء حورية فرغلي مع آسما إبراهيم وعلاقتها بالسحر

تصدّر اسم الفنانة حورية فرغلى ، ترند جوجل، لمحرك البحث جوجل، الأشهر عالمياً، بعد لقائها مع الإعلامية "آسما إبراهيم"، فى برنامج حبر سرى، المذاع عبر شاشة قناة "القاهرة والناس".

وكشفت الفنانة حورية فرغلى ، عن وجود مخلوقات من العالم الآخر في منزلها، قائلة، "عندى فى البيت بنت وولد من العالم الآخر، بشوفهم على طول وبيهزروا معايا كتير وبيخبطوا على الباب وبيفتحوا الباب وبيعملوا حاجات كده".

حورية فرغلي: «معملتش ثروة من التمثيل واعتزال الفن فكرة في دماغي»

كواليس لقاء حورية فرغلي مع أسما إبراهيم عبر برنامج حبر سري

وأضافت حورية فرغلى ، دائما بشوف البنت قاعدة على السفرة وشعرها زي شعري كده كاريه، وهى صغيرة كده والولد لابس شورت وفانلة وتقريبا هما الاتنين فى نفس السن، وصغيرين بس شكلهم لطيف جداً وكيوت كده شعرهم أسود وشبهنا كده ".

وكشفت قارئة كروت التاروت، أن هذه الكائنات مسلطة عليها، ومش جاية لكم من نفسها وخلينى أقول مثلاً معمولك حاجة تشبه السحر ومش معمول سحر لا.. هما موقفين حالك وموقفين الدنيا كلها.

وأشارت حورية فرغلى ، قائلة، "فيه فترة من الفترات كنت بسمع وأنا فى السرير صوت كأن حد بيتنفس بصوت عالي فكذا يوم وأول يوم قولت بيتهيألى، وبعد كده قولت لا فتحت الشباك لقيت بومتين بيض واقفين عند الشباك، وأنا فى الزمالك ومعرفش جم منين دول بس بقالهم فترة مش بييجوا".

وكشفت حورية فرغلى ، تفاصيل زواجها السابق، قائلة، "إنها تزوجت لمدة 3 أشهر فقط، وكنت مخطوبة قبلها من حب عمرى ومات قبل فرحى بيوم ولما جيت مصر ماما كانت عايزة تطلعنى من اللي أنا فيه فدخلتنى مسابقة "ميس إيجيبت" وكانت بتاخدني النادى كل يوم وهو شافنى فى النادى، واتعرف على مامى واتقدم لي وحصل جواز ومكنش فيه حب وإحنا أصحاب قوى، على فكرة لحد دلوقتي وبيحلف بالبامية بتاعتي وهو اتجوز وخلف ومبسوط وأنا مبسوطة إنى شفته مبسوط ".

وأشارت الفنانة حورية فرغلى ، خلال لقائها مع الإعلامية آسما إبراهيم عبر برنامج حبر سرى، والمذاع عبر فضائية "القاهرة والناس" قائلة، "كنت أحسن فارسة فى الوطن العربي، ومكنتش شايفة نفسى فى الموضوع ده، ولو أنا حبيت حاجة وهعملها لازم أبقى رقم 1 يا إما معملهاش خالص ".

وتابعت قائلة، " قمت بشراء حصان بمبلغ مليون جنيه إسترليني، وهو ما يعتبر أغلى حصان اشتريته كان بمليون جنيه إسترليني بما يعادل 20.5 مليون جنيه، وخلف وابنه بيخلف وعملت عيلة منه ".

وأشارت حورية فرغلى ، أنها لاتعيش قصة حب حالياً، قائلة " فى سن معين عايزة تحبى وتتحبي، والحب ده زى الهوا وانتي تعرفى البنت بتحب ولا لأ من عنيها لما عنيها تبقى بتبرق ومبتسمة وبيبان عليها إنها فى علاقة وأنا للأسف بعيدة عن الحاجات دى بقالى كتير حتى مبتعاكسش فى الشارع ".

ونوهت قائلة، "انا هييجي عليا يوم، والجمال هيروح وهقعد فى البيت وأنا مش هشد وانفخ وأحب إنى لما ابطل تمثيل يبقى عندي أسرة ونصي التاني أقضى بقيت حياتي معاه ". 

و قالت الفنانة حورية فرغلى ، إنها تعاونت مع النجم محمد رمضان خاصة وأنه شخصية فنية كبيرة، وتعاونا سابقاً فى مسلسل دوران شبرا فى بداية حياته الفنية ومشاركته مع فيلمى "عبده موته وقلب الأسد" بدون أجر، قائلة، "اشتغلت مع محمد رمضان فى عبده موته وقلب الأسد ومخدتش ولا مليم وكنت عايزة أساعده ".

ورددت انها لاتعلم موقفها من المشاركة من جديد مع الفنان محمد رمضان قائلة لو عملت معها عمل حالياً هاخد فلوس.

وأبدت حورية فرغلى ، عن ترحيبها بالعمل مع المخرج الكبير خالد يوسف، حال عرض عرض عليها اعمال، قائلة " لو اتعرض عليا أعمال مع خالد يوسف أعملها وليه لا، وعمرى ما طلبت اشتغل مع حد ".

ونوهت حورية فرغلى ، خلال لقائها مع الإعلامية أسما إبراهيم، إلى إقلاعها عن تناول المهدئات التي كانت تحرص على تناولها في الماضي.

وكشفت الفنانة تفاصيل لقائها مع الفنان الراحل هيثم أحمد زكى ، قائلة، "قابلت هيثم أحمد زكى فى بروفات فيلم كف القمر وقربنا من بعض وبصراحة كان بيصعب عليا قوى لأنه كان على طول هادى وساكت وساعات ممكن تلاقيه قاعد لوحده وعنيه مدمعة، وأنا كنت عايزة أقرب منه وأنكشه فحصل إن أنا طبعا بحبه جداً، وكان بالنسبة لي زميل عزيز وأكتر شوية بس هو ارتبط بيا أنا أكتر عاطفياً بس مكنش ينفع لأن أنا أكبر منه بـ 6 سنين وأنا مقدرش ".

وأضافت، أنها لا يمكن أن تتزوج بشخص أصغر منها، قائلة عن السبب هو تجربة هيثم، ولا يمكن أتجوز واحد أصغر منى بيوم، أنا حسيت بحاجة طبعاً ودماغى قالت لا إزاى وفعلا دى كانت آخر مرة اتكلمت معاه، سبب إنى مكلمتوش تاني قالي باى باي يا طنط، واخدت كلمة طنط دى جامد قوى، ومكنش بيهزر وكانت خناقة وأنا قولت أوكيه خلاص ".

وكشفت الفنانة حورية فرغلى ، على ان الفنانة رانيا محمود ياسين، هى الوحيدة التى كانت تسأل عليها  باستمرار أثناء خضوعها للعمليات الفترة السابقة رغم انها لم تعمل معها من قبل، قائلة "قبل العملية كان فيه ناس كتير بتكلمني بصراحة زى لطيفة، لبلبة، مادلين طبر، نبيلة عبيد و سهير رمزي وناس عمرى ما شفتهم كانوا بيكلموني قبل ما أعمل العملية وبعد ما جيت يمكن عشان تليفونى كان فيه مشكلة، ومحدش عرف يوصلى بس مفيش مشكلة يعنى، مشيرة إلى أن لديها مشكلة في هاتفها حيث كان لا يستقبل مكالمات وأنها كانت تكتفى بتطبيق واتساب فقط.

وأشارت حورية فرغلى  إلى أنها فقدت الثقة فى نفسها، بطريقة غير طبيعية، خاصة وأنها لم تجرى اى عمليات في شكلها قائلة انا كنت ملكة جمال مصر 2002، ومش محتاجة ألعب في شكلى وعملت 15 عملية ولسه فى عملية فاضلة.

وأشارت إلى أنها لم تكن تستطيع الحصول على جودة الطعام ولم تكن تعلم ماذا تأكل بالإضافة لعدم قدرتها على التذوق والشم قائلة مش موجودين وفضلت 4 سنين نسيت فيهم طعم الأكل وبعد آخر عملية.. الحمدلله رجعوا لي ".

ولفتت حورية فرغلى ، الأنظار لكونها لم تعد تتأثر بكلام المتابعين لها عبر وسائل التواصل الاجتماعي، بعد مرورها بفترة مريرة بسبب انتقاد المتابعين لها بسبب مظهرها بعد إجرائها عمليات التجميل في الأنف، والذى أحدث أذى كبير في نفسها لمدة استمرت نحو عامين، مؤكدة على ان كلام الناس كان بيفرق قوى معايا قبل كدة، وحالياً مبقاش يهمنى.