في ذكرى ميلادها.. مريم فخر الدين رفضت تشبيهها بصباح لهذا السبب
لم يفارق الصدق مريم فخر الدين، ظلت تمثل إدوارها بصدق شديدة للدرجة التي يعتقد فيها المشاهد أنها تجسد شخصيتها في الحقيقة، وكانت مريم فخر الدين صادقة في أحاديثها الصحفية والإعلامية لدرجة تظن أنها تؤدي دورًا في فيلم.
وفي ذكرى ميلاد أميرة السينما المصرية يستعرض “مستقبل وطن نيوز” أجزاء من أحاديث مريم فخر الدين التي كشفت فيها العديد من الحقائق بصراحة تحسد عليها، وقالت رأيها في كل من تعاملت معهم بما فيهم أقرب الناس إليها ابنتها.
مريم فخر الدين وصباح
رفضت مريم فخر الدين في أحد حواراتها تشبيهها بالفنانة صباح قائلة: " صباح عايزة تبقى شباب ٨٠ سنة، أنا مش عايزة كدا ، أنا راضية باللي ربنا عمله، أنا لا يمكن أعمل عمليات أو أشد وشي أبداً بأي حال من الأحوال.. أنا راضية بخلقة ربنا.
وأضافت مريم فخر الدين: أنا وضعي المادي كويس جدًا.. بس أعمل ليه، أعدل على رب العالمين؟.. هو خلقني حلوة و أنا صغيرة .. خلقني عجوزة دلوقتي، لازم أرضى.
مريم فخر الدين وفريد الأطرش
قالت مريم فخر الدين تصف أخلاق الموسيقار فريد الأطرش: كان لازم يعزمنا على طول حتى لو مش معاه تمن العزومة.. ممكن يعزمنا على جبنة وفول وطعمية المهم لازم يعزمنا.. ده في الأيام اللي كان فريد لسة على قد حاله ولما بقى مشهور وغني كان الكرم أكبر.
وتابعت مريم فخر الدين: مرة عملت عزومة في شقتي وطبعا كان من ضمن المعازيم فريد وانتظرته كتير كل شوية أطل من البلكونة منتظرة قدومه وفعلا جاء فريد ومعه بعض من أصدقائه ومازلت منتظراه على باب الشقة ولكنه لم يأتي.. قلقت عليه لأني شفته دخل العمارة.
نزلت لقيت فريد قاعد مع البواب وحواليه بوابين العماير اللي جنبنا والناس حواليه.. وهو عمال يغني بقاله أكتر من نص ساعة والناس مبسوطين جدا من تواضع وفن فريد ولما انتهى قلتله: أنت كل ده قاعد مع البوابين وسايبني منتظراك ؟!
قاللي: بصراحة عم عثمان البواب أول ماشافني قعد يمدح ويمجد فيا وقاللي أنا نفسي أحضرلك حفلة بس ظروفي متسمحش.. رديت وقلتله أنا هعملك حفلة مخصوص وقعدت أغني.. ودي من أجمل لحظات عمري يا مريم.. البواب من جمهوري زي ابن الباشا وابن والوزير.. هو ده الفريد فريد.
مريم فخر الدين وابنتها
وتحدثت مريم فخر الدين عن ابنتها في أحد البرامج قائلة: " يعني جات بنتي بعد ما خلصت ثانوية عامة، بقولها عايزة تطلعي إيه يا إيمان قالتلي ولا حاجة، قولتلها مش ممكن في بني آدم يطلع ولا حاجة كده في الدنيا.
وتابعت مريم فخر الدين " قولتلها طيب اطبخيلك طابخة، أعمللك فنجان قهوة، قالتلي لأ معملش قهوة بالكتير بالكتير أعمل شاي، طبعًا أنا كنت محطمة من الحتة دي طيب تعالي مثلي، ده إنتي أبوكي محمود ذو الفقار وعمك عز الدين ذو الفقار ومرات عمك فاتن حمامة وعمك صلاح ذو الفقار ومرات عمك شادية، وخالك يوسف فخر الدين".
وأوضحت: ": «طيب ده بؤرة فن وبتكره السينما خالص، عايزة تعملي إيه تقولي ولا حاجة، بس اتضح أن كلمة ولا حاجة دي لها طريق عظيم جدا، وهي ناجحة أكتر مني لأنها بتركب عربية مرسيدس مش دافعة تمنها وبدلدل شعرها من الشباك ومتعملش حاجة، وساكنة في بيت أحسن من بيتي، وجوزها مبسوط منها لأنها واحدة معملتش ولا حاجة فعلى طول مبتسمة هتزعل ليه في إيمان دي صنعتها ولا حاجة".
