بدرية طلبة: «الراجل لو شقيان بعد الشغل ندلعه ونستحمله»

علقت الفنانة بدرية طلبة، على إشكالية عدم قبول الرجل الحديث مع زوجته بعد عودته من المنزل، وإصرار زوجته على الحديث معه، موضحة: "لو الراجل يستاهل نستحمله، خاصة لو جاي من الشغل تعبان ندلعه وبعد كده نسمعه كل المواضيع خاصة إن المواضيع تخصه وتخصني وتخص العيال والراجل".

وقالت طلبة - خلال مداخلة هاتفية مع الإعلامية بسمة وهبة مقدمة برنامج "90 دقيقة"، على قناة "المحور"، مساء الإثنين -: "لكن لو الراجل جاي من مليطة مع صحابه المفروض يسمعني غصب عنه، الزوج رب الأسرة ولازم يتحمل ولازم يسمع لمراته عشان متلجأش لحد تاني".

بينما قالت وفاء قطب أصغر مأذونة في مصر، إنها وثقت حالات طلاق بسبب عدم قدرة الزوج على التواصل مع زوجته، قائلة: "كان في حالة الزوج مبيحبش يتكلم كتير، لكن الزوجة اجتماعية، وهو كان مانع الموضوع ده، فحست إنه خانق عليها وعاوزها جنبه في البيت".

وتابعت: "اتخنقت ومقدرتش أتكلم، وفهمت الرجل أولا إن دي طبيعتها، وإننا لازم نتقبل اختلافات بعض، وقعدت معاهم في أكتر من جلسة لحد ما دنيتهم مشيت تاني".

من جهتها قالت تدعى أم أحمد متصلة من الأقصر: "المفروض تستنى إن زوجها يريح ويأكل لقمة وبعدين تبدأ تتكلم معاه، ومتاخدهوش على الحامي عشان لو في مشكلة تتحل".