«مبسوط إنك رئيس الجمهورية؟».. 10 أسئلة للرئيس من ذوي الهمم
أدار الفنان أشرف عبدالباقي، جلسة حوارية بعنوان "حوار مع الرئيس" خلال احتفالية النسخة الثالثة من "قادرون باختلاف"، لأصحاب القدرات الخاصة وذوي الهمم.
ووجه عددا من أبطال ذوي الهمم 10 أسئلة للرئيس السيسي، والذ بدوره أجاب عنها جميعا، وقوبلت بتصفيق حار من الحضور في قاعة الاحتفالية. وجاءت أبرز الأسئلة كالتالي:
إيه أكتر أمنية شخصية تتمناها، وإيه أكتر أمنية لمصر حضرتك نفسك تحققها؟
أكتر أمنية شخصية أن ربنا يرضى عني.. وديه أمنيه عزيزة أوي.. ربنا عظيم السموات والأرض وصاحب الكون كله والملك كله.. يا ريت يرضى.. وبالنسبة لمصر أنا بحلم لها وبيها ولكم ولكل الناس.. إحنا مشينا خطوة من ألف وباقي ألف خطوة".
كم ساعة يعمل الرئيس في اليوم؟
معرفش أقعد من غير شغل؛ لأني بحلم، وعاوز الناس كلها تحلم، لما تحلم وتجري على حلمك أي حد فينا يحلم نقول يا رب ونجري لازم ربنا هايساعدنا، اللي بيشتغلوا معايا زهقوا مني الدكتور مصطفى مدبولي، قالي ارحمني بقى بس هانعمل إيه نفسنا نشوف بلدنا أحسن بلد.
من هو مثلك الأعلى؟
تأثرت بنماذج كثيرة.. أول من تأثرت بهم أسرتي.. والدي ووالدتي.
والدتي كانت سيدة شديدة الحكمة والصبر.. علمتني التجرد وإني أشوف الأمور بعيد عن الهوى والتمييز ووالدي كان شديد الهمة فضل يعمل من الفجر لحد الساعة 12 بليل، هو كان مسؤول.. كان بيحب العمل في أمور كتير أخدتها منه، وكمان كان لي عم شديد الكرم والرفق بالناس نموذج كريم جدا مع الأطفال والبنات ومع الضعاف.
إيه أجمل لحظة مرت على حضرتك في حياتك، وأيه أصعب لحظة؟
سؤال صعب أوي، أصعب لحظة لما حسيت فيها إن بلدنا ممكن تروح.. وأحيانا يكون فهمك للمشكلة يعذبك.. لأنك لما تعرف أوي وتفهم أوي هتتعذب أوي لأنك بتشوف حاجات محدش هيشوفها غيرك، وهتفهم حاجات محدش هيفهما غيرك.. لذا أصعب لحظة أتصور مرت بيه هذه اللحظة.
أنا خفت على ناسي وأهلي وكل المصريين لأن عددنا كبير ومشاكلنا كتيرة وظروفنا صعبة.. لو البلد راحت الناس ديه هتروح فين.
أما أجمل لحظة لم تأت بعد، وأسعد لحظة هو الحلم الذي أحلمه لبلدي وللمصريين شبابنا والكبار والقادرون باختلاف الذي أعول عليهم أمام الله أنه يساعدنا.
انت مبسوط وأنت قاعد معانا؟
هقولك بجد وربنا وحده اللى يعلم.. اسعد يوم بكون فيه لما بكون معاكم.. اليوم اللى بشوفكم وببقى في وسطكم.. وجودك هو سبب السعادة.. ربنا ينزل على قلبى البهجة والسعادة والسرور والرضا.. أنا بحبكم جدا جدا جدا.
ما هي الرياضة المفضلة التى يمارسها الرئيس السيسى؟
كنت بمارس رياضة الكاراتيه منذ خمسين عام، واللعبة شديدة الانضباط وتعلم الخلق الحسن وتعلم صاحبها القيم، والمبادئ وتجعل منه نموذجا فريدا فى التعاون، والاحترام، والقدوة.
لسه بتكلم صحابك اللي كانوا معاك زمان؟
مبقاش في فرصة بسبب منصبي وده تقصير مني بسبب الظروف.. الوظيفة هي اللي عاملة كده. بس أنا غلطان.
كان نفسك تطلع إيه؟!
كان نفسى أطلع طيار، ودخلت الكلية الجوية سنة 1970 لكن محصلش نصيب.
من هي أكثر شخصية تاريخية بتحبها؟
النبي محمد صلى الله عليه وسلم والصحابة.
مبسوط إنك رئيس جمهورية مصر العربية؟
السؤال صعب أوي.. أنا في النقطة دي بالذات بقول: «يؤتي الملك من يشاء وينزع الملك ممن يشاء.. وبقول يا رب زي ما حملتني المسؤولية قدرني إني أسعد الدنيا كلها.. هو ده لو قدرت أعمله هاكون راضي عن تولي الوظيفة دي.. أنا دايما بطلب منه يساعدني».
