الإعلامي إبراهيم فايق يتحدث لأول مرة عن تجربته مع المرض
طرح الإعلامي إبراهيم فايق، مساء الخميس، الفيديو الخاص به في سلسلة "التحدي" المشارك بها عددًا من الفنانين.
وتحدث إبراهيم فايق في الفيديو عن تجربته الصعبة مع المرض، وكيف شعر أن حياته قد تتأثر بعدها، وتحدى نفسه من أجل تجاوز تلك الأزمة.
وأوضح فايق في شرحه لسبب تصوير الفيديو الخاص به في التحدي: "الفيديو ده اللي مدته ثواني معدودة بيحكي قصة حياة أصعب سنة مرت عليا.. زي دلوقتي بالظبط ربنا اختبرني بالإصابة بجلطة في الشريان الرئوي.. قعدت شهور بعدها بعيد عن حياتي الطبيعية".
وأضاف: "ارتباك رهيب.. وزن زايد فوق 15 كيلو مع وضع صحي صعب، أمور بتبقى معقدة شوية خلت النفسية بقت صفر الحقيقة.. ناهيك بقى عن كلام كذب اتقال عني (قريته لما خرجت من المستشفى) وعن أسباب الجلطة غير كام خبر ضرب لناس استعجلت قضاء ربنا وكتبت أني توفيت".
وتابع إبراهيم فايق: "حاجات عقارب الزمن بيقف عندها؛ يعني أنا لو كنت مت؟ مكنش حد هيقول الحقيقة؟ كانت الناس هتنهش كده في حقي وأنا مش موجود معاهم أرد على كذبهم؟".
واستطرد: "من ناحية تانية بقى بالنسبة لي مجرد إني أشوف الجيم من بعيد ده حلم، علشان كده فاكر أول يوم نزلت اتمرن، عيطت لما عرقت، مكنتش متخيل إني هعرف أحس الإحساس ده تاني، لكن الحمد لله اتحسنت للدرجة إن الدكاترة قالوا تقدر ترجع واحدة واحدة".
وواصل فايق سرد تجربته مع المرض: "بقى عندي تحدي تاني.. هنعمل إيه في الوزن الزايد، شهرين أو أكتر بحاول أخس مفيش فايدة، كل حاجة عطلانه، معافرة كتير مع جسمي ومحاولات مضنية على مدار شهور، حرمان والتزام وإصرار أن أرجع تاني بنفس لياقتي، أنا بحب الرياضة للرياضة، وطول عمري بحب التحديات وعارف كويس إن قوة الشخص بتبقى أنه يصدق نفسه ويساعدها في أي حاجة وكل حاجة نفسه يعملها".
وأردف: "بالمناسبة على الصعيد المهني اللي متابع صعودي الإعلامي هيلاقيه بيحصل على مدار 16سنة من التطور والمجهود والتحديات اللي محدش يعرف أنا تعبت وعانيت فيها قد إيه.. عمر ما فيه حاجة جاءت لي سهلة أبدا.. الكواليس دايما كانت متعبة ومهلكة".
واستكمل فايق: "كونت قناعة أن لازم التجربة دي تتحكي.. كنت عايز اختصر فيها الزمن وأساعد ناس كتير الظروف (أي ظروف) بتعاندها، علشان كده الفيديو ده ليك أنت، مش شرط تمر بظروف مرضية.. مش شرط يكون حلمك أنك تلعب رياضة، بس أكيد مريت بظروف حاولت تكسرك، تبعدك، تدمرك، هتفهم في الفيديو ده أنك تقدر تبقى قوي وتغلب كل الظروف بس بتعب وحرمان ومجهود وسهر".
واختتم إبراهيم فايق موضحًا: "رسالة حبيت أوصلها لعل ربنا ينفعني بيها مفيش أعذار، المجد بيتكتب بعرقك مش بالأحلام ولا الأمنيات، بحبكم".
يذكر أن عددًا من الفنانين أعلنوا مشاركتهم في فيديوهات التحدي ومنهم حنان مطاوع، يسرا اللوزي وأحمد فهمي، ويحكي كل منهم تجربته مع تحدي صعب واجهه في حياته.
