حلا شيحة.. صورة بدون حجاب تفتح النار على نجمة التريند

حلا شيحة عادت إلى الترند مجددا بعد نشر صورة لها بدون حجاب، ما جعل سهام النقد توجه إليها من جديد؛ خاصة بعد أزمتها الأخيرة مع تامر حسني بسبب أغنية (بحبك) من فيلم "مش أنا"، التي هاجمت فيها حلا شيحة تامر حسني لأنها غير راضية عن المشاهد التي ظهرت فيها؛ ما أجبر تامر حسني على الرد؛ ليحدث سجال بين النجمين، ودخل زملاؤها على الخط، إضافة إلى نقابة المهن التمثيلية. 
 

الصورة المنشورة وجدت على صفحة تحمل اسم حلا شيحة لكنها بدون العلامة الزرقاء التي تؤكد ملكية الفنانة لها، وهي صورة قديمة، خاصة أن حلا الآن ترتدي الحجاب، وليس في نيتها العودة إلى الفن مرة أخرى، ونتيجة هجوم حلا على الفن والفنانين فقد أثارت حالة عارمة من الغضب تسببت في الكثير من إثار الجدل في الفترة الأخيرة. 
 

ضربة البداية سددتها حلا شيحة على حسابها بموقع إنستجرام بعد نشر أغنية "بحبك" حين كتبت تقول "أنا اتفاجئت جدا بنزول كليب يجمع مشاهد متفرقة من الفيلم في أيام ذي الحجة المباركة، وخصوصا بعد آخر بوست نزلته وضحت فيه أنا إيه، واتفاجئت أكثر خصوصا بعد وعد تامر حسني ليا وتأكيده إنه هيحترم رغبتي وبعض الطلبات اللي طلبتها منه بكل احترام، ورد الصيف اللي فات، وأكدلي أنه هيحترم رغبتي"
 

وأضافت حلا شيحة : "أنا عارفة ومتأكدة أن زملائي جواهم خير بس للأسف فتنة الشهرة والنجاح مش بتخلينا نشوف".

ووجهت عبارات قاسية وهي تقول: "بتكلم من قلبي الكليب ده ميرضيش ربنا.. وأنا عيطت لأني شفت نفسي في المشاهد دي، دي كانت زلة نتيجة ظروف مريت بيها وكلنا بنغلط، أنا مش هاتكسف أنا تبت من المشاهد دي وهي لا تصح وأنا غلطت وبصلح، والفن اللي بيخلينا نبعد عن منهج ربنا ومنبقاش قدوة لولادنا يبقى باطل وميبقاش فن".
 

وإلى تامر حسني قالت حلا شيحة:"الفيلم عمل إيرادات ونجح بمقاييس الدنيا، بس لم ينجح بمقاييس الآخرة، استغفر ربنا يا تامر وتوب عن اللي إنت فيه، وافتكر لما قولت أنا عايز أموت وأنا مش مطرب".

ولم يقف تامر مكتوف الأيدي، قال على صفحته بموقع فيسبوك: "نهاركم جميل يا أغلى الناس، الحقيقة عمري ما بتخيل إني أدخل في نقاش بالشكل دا مع زميل بحترمه وكان في بينا كل خير، للتوضيح بما إنك يا حلا كتبتي بوست وأشركتي الجمهور الكريم معانا بدل ما كنتي تكلميني شخصيا، ونتناقش بيني وبينك، فا أنا مضطر أرد هنا برضو".
 

وتابع: "أولاً أنا عمري ما وعدتك إن الكليب مش هينزل.. دا محصلش أصلاً يا حلا مش أنا خالص اللي أوعد وأخلف، الحقيقة إني احترمت كلامي معاكي، وعدتك أشيل مشاهد تانية طلبتيها وشيلتها بالفعل وشكرتيني عليها، ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة".

وأضاف تامر حسني موجها حديثه لحلا شيحة: «وبعدين الفيلم بقاله 3 أسابيع في السينمات والكليب موجود جوه الفيلم هو بالنسبالك الحرام إننا ننزل الكليب على يوتيوب بس، إنما الكليب يتشاف جوه السينمات عادي، منطق غريب فعلاً يا حلا، وبعدين هو مش إنتي اللي مضيتي عقد وتقاضيتي عليه مبلغ كبير عشان الدور دا بعينه".
 

واستكمل هجومه قائلا: "هو مش إنتي اللي صورتيه ومثلتيه بنفسك وبمنتهى الرضا ولا حد أجبرك؟ وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظة تقوليها، ماكنتيش بتردي علينا وتليفوناتك كلها كانت بتقفل في وشنا".

وعنف حلا شيحة بقوله: "إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأة اختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع، وبقيتي تقفلي تليفوناتك و تكنسلي علينا كلنا وبعدين أي فيلم بيبقى ليه خطة مسبقة في الدعاية، وأنتي عارفاها كويس ووافقتي عليها ودا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل".

وعاتبها في النهاية قائلا "أنا زعلان منك جدا يا حلا على مفردات البوست بتاعك غير الموفقة ومستحيل هرد بطريقتك اللي فيها تجريح واتهامات باطلة ليا احتراما لحجات كتير يمكن فايتاكي بس مش هتفوتني، وعلى فكرة أنا واثق أنك عارفة إني مستاهلش منك كدا وهكتفي بالتوضيح دا وربنا يهدي الجميع، ويكتبلك كل الخير اللهم آمين".