أشرف عبدالباقي يواجه اختفاء المسرح بالإسكندرية.. وخاطر ومنير يعلقان

كشف الفنان أشرف عبد الباقي، الأسباب التي شجعته على عرض مسرحيته “مسرحية كلها غلط” في الساحل الشمالي، مشيرا إلى أنه واجه اختفاء المسرح من الإسكندرية في الفترة الصيفية.

وقال عبدالباقي، في تصريحات تلفزيونية، "زمان في إسكندرية كنا حوالي 15 فرقة نعرض فترة الصيف كلها، وبعدين اختفى المسرح، وكل الناس راحوا الأول العجمي وبعدين مراقيا وبعدين ماربيلا ووصلوا لمطروح دلوقت.. كانت الفكرة إني أروح الساحل، ده مكان متعرضش فيه مسرح قبل كده، وفي كم كبير موجودين، وأنا في مكان متوسط الساحل قدام مارينا بالضبط. وبرضه بعرض حاجة بالنسبة للناس جديدة، أنا لفيت بيها كتير لكن كان مهم أشوف نوعية جمهور مختلفة من مصر كلها وقت المصيف."

يذكر أن مسرحية "جريما في المعادي - مسرحية كلها غلط" ممصرة عن الرواية الكوميدية الإنجليزية The Play That Goes Wrong، وهي بطولة أشرف عبد الباقي ومجموعة كبيرة من الشباب.

ومن جهته، أشاد الفنان مصطفى خاطر بالجيل الجديد من الممثلين في مسرحية الفنان أشرف عبد الباقي "جريما في المعادي - مسرحية كلها غلط"، وذلك بعد حضوره عرض المسرحية في الساحل الشمالي.

وأضاف، "والله هما معاهم أستاذ أشرف، هو أكتر واحد ناصح، وأكتر واحد يقدر يعمل فرقة ويخلي الفرقة كلها أسرة واحدة بمعنى كلمة أسرة."

وتابع: "الجيل الجديد أحب أطمنك إن هما بجد موهوبين جدا، وبعيدا عن الموهبة أستاذ أشرف مدربهم تدريب عالي جدا، لأن هي مسرحية خواجاتي وشكلها جديد على المسرح المصري."

وفي سياق متصل، علق الفنان شريف منير على حضوره عرض مسرحية الفنان أشرف عبد الباقي "جريما في المعادي - مسرحية كلها غلط" في الساحل الشمالي.

وقال منير: "أنا حضرت العرض لإن أشرف أولا عشرة عمر كبيرة جدا، بينا سنين وشغل وصداقة قوية جدا. بعدين أنا العنصر المحبط بالنسبة له، بقول له كل العقبات اللي ممكن يقابلها لما ييجي يخش مشروع، وهو بيحب يسمع مني لأنه بيعمل العكس تماما، وكل ده بيقلبه إيجابيات."

وأضاف: "أشرف قدر يطلع جيل نجح وبقوا نجوم، إنما أنا عايز أتكلم عن الموجودين دلوقت، واعدين جدا وشاطرين جدا، وأنا حبيتهم كلهم."