شريف مدكور يعلق على المنشور المثير للجدل: «ناس بتطلب مني أدفعلها قسط الموبايل»

كشف الإعلامي شريف مدكور، عن أسباب كتابته المنشور المثير للجدل، عبر صفحته الرسمية بموقع "فيس بوك". 
وكان شريف مدكور كتب عبر موقع Facebook: "صباح الخير ياريت محدش يبعت يطلب مني أنه يستلف فلوس علشان أنا ضد الموضوع ده، أنا عارف إن الحياة صعبة، بس على قد لحافك مد رجليك شكرًا"، وتلاها بتوضيح جاء فيه: "في ناس كتير هاجمتني والموضوع بقى تريند مع أنه تافه جدا، ومش أول مرة أكتبه، أنا بس عاوز أفهم يعني إيه حد أنا معرفوش يبعتلي يقولي أنا عاوز استلف 100 ألف جنيه، أولا اللي عاوز يستلف عمره ما بيبعت لحد ميعرفوش هيبعت لحد من أهله، وفي حدود في الطلب والسلف".

وقال مدكور، في مداخلة مع عمرو أديب، في قناة "إم بي سي مصر"، "ناس كتير بتبعتلي تقولي عاوزين نستلف منك"، مضيفا "في مرة واحد بعتلي بيقولي أنا سايب الشغل وبقالي 3 شهور مش قادر أدفع قسط الموبايل، أنا محتاج منك 6 آلاف جنيه".

وأضاف "الرسايل اللي بتجيلي من قبل موضوع تصوير بيتي".

وهاجم من انتقدوه قائلا "أنا مطلبتش من حد فلوس وأنا عيان ومعملتش كده ومش هاعمل كده".

وتابع "الموضوع بقى كتير، وكتبت البوست علشان محدش يبعتلي، ومع ذلك لسه في ناس بتبعتلي".

واختتم شريف مدكور: "لو حد مريض ومش عارف يدفع فلوس المستشفى هانروح المستشفى وندفعله، لو حد محتاج مصاريف المدرسة، بنروح نشوف المدرسة وبندفعله، لكن ممكن تلاقي حد يقولك حولي على حسابي طبعا ده مش هايحصل".