«ليه نقحم عمرو دياب في جملة مفيدة».. تامر حسين يرد على رامي صبري ويدافع عن عزيز الشافعي

دافع الشاعر الغنائي تامر حسين، عن الملحن عزيز الشافعي، بعد اتهام الفنان رامي صبري له بأخذ أغانيه وإعطائها للفنان عمرو دياب، خصوصًا أغنية "شكرًا" وأنه لن يتعاون معه مرة أخرى، مشيرًا إلى أن رامي يتجنى على "الشافعي".

ونشر تامر حسين عبر صفحته الشخصية بموقع التواصل الاجتماعي "فيسبوك" منشورًا كتب فيه: "ردًا على شكرًا  والمُهاترات اللي بسمعها.. ولا ليه بنجيب وبنقحم دايمًا اسم عمرو دياب فى جُملة مفيدة ؟ ايه الغرض؟.. ثانيًا: توقيت البوست لما الأغنية انتشرت وكسرت الدنيا بالتفاعل وإقبال الناس عليها  والإشادة بيها يعني ليه الكلام ده".

وأضاف: "ليه مكنش فى أول يوم مثلاً؟  ده لو فعلاً الكلام على حق.. ثالثًا اللى اتعلمته ومن أدبيات المهنه ولازم الناس كلها تفهمه فكرة الذوقيات.. يعنى إيه؟ يعني نبارك لبعض نهنى بعض مش نتهم الناس فى عز نجاحهم بالباطل لما أى مُطرب فى الدنيا بتعجبه أغنية المؤلف والملحن بيعملوا تنازل عن حقوق الاستغلال  للمطرب الآخر".

وتابع: "طالما ماحصلتش الخطوة دى من زمان تبقى الأغنية ملك الشاعر والملحن لحين اختيار الأفضل وارد جدًا تسمع مطرب زميل أغنية من سنة سنتين ولضعف الرؤية الفنية مايتخيلش نجاحها ده اللى بيفرق مطرب عن مُطرب ف سُرعة اتخاذ القرار أنا شايف إن فى تجنى على حق المُلحن عزيز الشافعي أدبيًا ومعنويًا دي شهادة حق".

وأردف تامر حسين: "مش شايف تمامًا أي داعي يسمح بالكلام والصراعات دي.. وللمرة المليون الناس المُحترمة ما تعلنش مشاكلها فى العلن.. عيب فى خصوصيات مايصحش ندخل الجمهور فيها ونتهم ناس محترمة بالباطل أكيد مش هنزل فويس نوت نستشهِد بيها واحنا أصحاب الحق وربنا يهدى".

وأنهى الشاعر تامر حسين كلامه: "أخيرًا ياما ناس سمعت أغانى من سنه وسنتين ومكنش ليهم نصيب فيها ماعملهوش اللى بيتعمل ده لما الأغنية تنجح بالعكس فرحوا واتمنوا إنها ياريت لو كت أغنيتهم بكل حُب وتقدير وروح حلوة وده بوست بكُل حُب والله عشان معنديش كلام يتقال تانى مش عايزين الموضوع ياخد أكبر من حجمه، هي شُهرة لا لأغنية أكتر بس مابحبش الطريقة دي من الشهرة".