صلاح عبد الله: «أنا زملكاوي بالوراثة.. ومش عارف بقيت ممثل ليه؟»
أكد الفنان صلاح عبد الله، أنه يفضل لقب "الممثل " أفضل من لقب " النجم " كاشفًا أنه كان في البداية يحب كلمة " مشخصاتي" لخفه دمها قائلًا: " بحبها أوي لخفة دمها بس قدمت شوية ولما كنت بعمل مسرح كنت بحب كلمة " مضحكاتي " لأن الهدف الأساسي من المسرح إضحاك المتفرج ".
وأضاف- في حواره مع الاعلامية لميس الحديدي عبر برنامجها " كلمة أخيرة " المذاع على شاشة " ON" قائلًا: " بعد كده بقيت " ممثل " لأني بحس إن قيمتي كصلاح عبد الله أني ممثل وأنا دائمًا ببقى ناسي إني ممثل لكن لما بيجي ناس تسلم عليا بيفكروني إني ممثل"
وواصل: " أما على السوشيال ميديا لما بلاقي ناس بتتفاعل معايا وبتفكرني بأدوار معينة وإفيهات قلتها.. دول بقى بيحسسوني بنعمة ربنا عليا وبحس وقتها إني محبوب بجد"، مشيرًا إلى كونه محبوبًا هو الأهم بالنسبة له معتبرًا أنه لم يفكر يومًا في بدايته أن سيصبح صلاح عبد الله المحبوب، مؤكدًا أنه كان يحب التمثيل منذ أن وعى على الدنيا".
وتابع:" أنا بقيت زملكاوي بسبب أسرتي لأن والدي وإخواتي وجميع أقاربي كانوا زملكاوية، وبالتالي بقيت زملكاوي بالوراثة لكن بقيت ممثل ليه؟ مش عارف لأن مافيش حد في العيلة بقى ممثل ووالدي كان موظفًا في وزارة الصحة وأمي كانت ربة منزل وظيفتها إدارة المنزل لأنها من قامت بإدارة والدي..".
وأوضح: "ليه بقول إن أمي هي اللي أدارت أبويا لأنها أخدت قرارات مهمة فلما جينا ننقل من بولاق أبو العلا لبولاق الدكرور هي من أخذت القرار وأخذت الأرض وهي من قامت بالبناء كانت بتعمل كل حاجة لأن أبويا بطبيعة وظيفته كان بيقضي معظم وقته في الشغل لكن أبويا كان راجل نشيط وكان بيصحى الصبح يعملنا الفطار لما أمي تعبت، وهنا جاء دوره وشال أمي وشالنا وبعدين لما تعب أخويا الكبير شالنا كلنا ".
