عمر كمال يرد على حمو بيكا: «ضمنتك في أكتر من مليون جنيه.. واتوسطتلك في النقابة»

خرج المطرب عمر كمال للرد على هجوم مغني المهرجانات حمو بيكا، معبرًا عن غضبه الشديد واستياءه، بسبب تحمله للكثير من الإهانات من قبل بعض الأشخاص في وسطه، موجهًا لبيكا بأنه من الممكن أن يخرج ويهينه كما هانه ويقول: "أبو كرش"، مؤكدًا على أن كل هذه أمور بالنسبة له "قلة أدب" وإهانات ليس له فيها.

وقال عمر في بث مباشر نشره عبر صفحته الشخصية بموقع التواصل الاجتماعي "فيسبوك": "أنا أول أغنية أتربح من خلالها كانت من خلال أغنية أنتي معلمة وكل الأغاني اللي قبل كده كنت بديها لحمو بيكا، عشان يرفعها من خلال قناته ويكسب منها بما فيهم أغاني كانت من إنتاجي أنا، والله مكنتش بأخد فلوسهم لأني بكسب من زمان وسيبتك تأكل عيش".

وأضاف: "الشخص اللي بيتكلم عليا ده أول ما بينزل من إسكندرية بيجي على شقتي وواكلين عيش وملح مع بعض، اللي حصل إن وأنا قاعد عند الحلاق بتاعي ومعايا حمو فوجئت إنه جايب شخص بتاع فساتين وعايزنا نعمله إعلان من غير ما ياخد إذني، وأنا اتحرجت أرفض قدام الراجل، بس أنا مش عايز أعمل مهرجان لفستان فرح، أنا عايز أعمل فن كويس زي بنت الجيران وعود البطل وكل مهرجاناتي، وحتى بعد الاتفاق مدفعش ليا عربون ولا سألني تأخد كام، على عكس ما بعمل معاه في أي فرح حد بيطلبه فيه".

وتابع: "عيب تقول عليا إني صحبة مزيفة، أنا عمري ما كسبت من وراك، أنا سيبتلك 12 تراك كلت من وراهم الشهد، حتى العربية بتاعتك اتصدرت أنا ومدير أعمالي عند المعرض عشان يقسطهالك، وضمنتك في مليون 800 ألف جنيه، ولو كنت لوحدك مكنش حد هيديك عربية.. وأتوسطتلك في نقابة المهن الموسيقية علشان أحللك مشاكلك معاهم".